At agynan ýerde toý bolar
2022-nji ýylyň 19-njy aprelinde Türkmenistanyň Döwlet sirkinde «Galkynyş» milli at üstündäki oýunlar toparynyň çykyşy görkezildi. Bu dabara Türkmenistanyň Daşary işler ministrliginiň Halkara gatnaşyklary institutynyň talyplary hem tomaşaçy bolup gatnaşdylar. Türkmenistanyň Döwlet sirkiniň sahnasynda şan-şöhraty dünýä dolan behişdi bedewlerimiziň joşgunly çykyşlary tomaşaçylarda uly täsir galdyrdy. Dünýäniň bäş gezek çempiony bolan «Galkynyş» milli at üstündäki oýunlar toparynyň çykyşlary özüniň özboluşlylygy bilen dünýäniň ençeme ýurtlarynda tomaşaçylary haýrana goýandyr.
Mälim bolşy ýaly, şu günler Türkmen bedewiniň milli baýramy mynasybetli ýurdumyzyň dürli künjeginde baýramçylyk dabaralary giňden ýaýbaňlandyrylýar. Baýramçylyk çäreleriniň çäginde bedewlerimize bagyşlanyp, ýörite sergiler gurnalýar. Mundan başga-da, döwletimizde behişdi bedewlerimiziň milli baýramy bellenilýän günlerinde ahalteke bedewleriň halkara gözellik bäsleşigi geçirilýär. Şeýle-de, ýakynda baýramçylyk mynasybetli Aşgabat — Mary ýolunyň kesgitlenen bölegi boýunça uzak aralyga atly ýörişiň geçirilendigini hem aýratyn bellemek zerurdyr.
Senemgül Allakowa,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
1-nji ýyl talyby.