Aşgabatda VII Ýapon kinofestiwaly geçirildi
2023-nji ýylyň 15-17-nji dekabry aralygynda “Aşgabat” kinoteatrynda Ýaponiýanyň Türkmenistandaky Ilçihanasynyň we Türkmenistanyň Medeniýet ministrliginiň bilelikde gurnamagynda VII ýapon kinofestiwaly geçirildi. 15-nji dekabrda kinofestiwalyň açylyş dabarasyna ýapon kino sungatynyň muşdaklary bilen bir hatarda Ýaponiýanyň Türkmenistandaky Ilçisi Sasaki Hirosini we Türkmenistanyň Medeniýet ministriniň orunbasary Nursähet Şirimow hem gatnaşdylar.
Kinofestiwalyň çäklerinde hödürlenen “Diňe pişik bilýär” filmine Türkmenistanyň Daşary işler ministrliginiň Halkara gatnaşyklary institutynyň mugallymlary we ýapon dilini öwrenýän talyplary hem tomaşa etdiler. Filmde ýaşuly är-aýalyň durmuşy barada gürrüň berilýär. Bu wakalar ýarym asyr mundan ozal Ýaponiýada ykdysady ösüş döwründe bolup geçipdir. Gahrymanlaryň özlerini alyp barşy we aragatnaşyk usulyna syn etmek tomaşaçylar üçin örän gyzykly boldy.
Türkmen ýaşlary ýapon medeniýeti, kinematografiýasy, esasan hem, bütin dünýäde meşhur bolan ýapon animasiýasy bilen gyzyklanýar. Bu kinofestiwal bolsa türkmen talyplarynyň ýapon dilini öwrenmäge bolan höwesini has hem artdyrdy.
Dünýägözel Babahanowa,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň öwreniji mugallymy.