Aşgabatda Koreýa Respublikasynyň esaslandyrylmagynyň Milli güni bellenildi
2024-nji ýylyň 2-nji oktýabrynda Aşgabatdaky «Ýyldyz» myhmanhanasynda Koreýa Respublikasynyň Türkmenistandaky ilçihanasy tarapyndan ýurduň esaslandyrylmagynyň Milli güni mynasybetli dabaraly çäre geçirildi. Bu dabara Türkmenistanyň daşary syýasat edarasynyň wekilleri, daşary ýurtlaryň ýurdumyzdaky diplomatik wekilhanalarynyň agzalary, köp sanly myhmanlar gatnaşdylar. Dabarada ýurdumyzyň ýokary okuw mekdepleriniň çeper höwesjeňleri, şol sanda Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 3-nji ýyl talyby Peristan Töräýewa hem koreý dilinde şowhunly aýdym-sazly çykyşlary ýerine ýetirip, myhmanlarda ýakymly täsirleri galdyrdy.
Ýeri gelende bellesek, 3-nji oktýabr — Günorta Koreýanyň esasy baýramçylyk seneleriniň biri bolup, bu günde ýurduň esaslandyrylmagynyň Milli güni ýokary derejede bellenilýär. Rowaýata görä, bu sene koreý halkynyň atasy Tangunyň doglan günüdir. Ol Gündogarda ilkinji döwleti gurup, Koreýanyň taryhynda ilkinji sahypany açdy.
Şunuň bilen baglylykda, Koreýa Respublikasynyň Türkmenistandaky Adatdan daşary we Doly ygtyýarly ilçisi Ji Kýu-Taek gutlag çykyşynda halkara gatnaşyklarynda erkinligi, parahatçylygy we abadançylygy öňe sürýän ýurt hökmünde Koreýanyň alyp barýan daşary syýasaty, şeýle hem netijeli ösdürilýän türkmen-koreý gatnaşyklarynyň strategik ugurlary barada durup geçdi. Ilçi däp bolan ynsanperwer gatnaşyklary pugtalandyrmagyň ähmiýeti barada aýdyp, bilim, ylym, saglygy goraýyş, medeniýet, syýahatçylyk we sport boýunça netijeli gatnaşyklary mundan beýläk-de ösdürmegiň möhümdigini nygtady. Şunda BMG-niň Baş Assambleýasynyň 78-nji sessiýasynyň 63-nji plenar mejlisinde Türkmenistanyň başlangyjy bilen 2025-nji ýylyň «Halkara parahatçylyk we ynanyşmak ýyly» diýlip yglan edilmeginiň aýratyn ähmiýete eýedigi bellenildi.
Dabaraly kabul edişligiň dowamynda ýerine ýetirilen aýdym-sazly çykyşlar dabara gatnaşanlara ruhy lezzet paýlady.
Atamyrat ÝAZWELIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniñ III ýyl talyby.