ARGENTINANYŇ ÝURDUMYZDA TÄZE BELLENEN ILÇISINIŇ GATNAŞMAGYNDA OKUW SAPAGY GEÇIRILDI
2026-njy ýylyň 25-nji aprelinde Türkmenistanyň Daşary işler ministrliginiň Halkara gatnaşyklary institutynda Argentina Respublikasynyň Türkmenistandaky täze bellenen Ilçisi (oturýan ýeri Moskwa ş.) Enrike Ignasio Ferrer Wiýeýranyň gatnaşmagynda okuw sapagy geçirildi. Oňa institutyň professor-mugallymlary we talyp ýaşlary gatnaşdylar.
Okuw sapagynyň dowamynda hormatly myhman özüniň diplomatik tejribesi barada giňişleýin çykyş etdi we Argentina Respublikasy bilen Türkmenistanyň arasyndaky ikitaraplaýyn gatnaşyklaryň häzirki ýagdaýyna ýokary baha berdi. Ol aýratyn hem söwda-ykdysady we medeni-ynsanperwer ulgamlaryndaky hyzmatdaşlygyň geljegine uly üns çekdi. Argentina Respublikasynyň dünýä derejesindäki diplomatik strategiýalary we sebitara hyzmatdaşlykda eýeleýän orny barada berlen maglumatlar talyplar üçin aýratyn gyzykly boldy.
Mundan başga-da, ol geljekki diplomatlara häzirki zaman dünýäsinde zerur bolan başarnyklaryň, esasanam, köptaraplaýyn diplomatiýanyň we sanly tehnologiýalaryň ähmiýetini düşündirdi. Okuw sapagynyň ahyrynda talyp ýaşlar ilçä özlerini gyzyklandyran sowallary berdiler. Ilçi institutyň geljekki halkaraçy hünärmenleri taýýarlamak babatyndaky işine ýokary baha berip, talyp ýaşlara okuwlarynda üstünlikler arzuw etdi.
Hatyja BAÝRAMGELDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 3-nji ýyl talyby.