ANKASAM-YŇ GURAMAGYNDAKY HALKARA MASLAHATY
2021-nji ýylyň 22-nji maýynda Türkiýe Respublikasynyň Ankara krizis we syýasat gözlegleri merkeziniň guramagynda göni wideoaragatnaşyk arkaly “Ösüp barýan Aziýa geosyýasaty” atly halkara maslahaty öz işine başlady. Oňa sanly wideoaragatnaşyk ulgamy arkaly dünýä döwletleriniň birnäçesinden, TÜRKSOÝ we beýleki halkara guramalaryndan akademik professorlar, doktorlar, şeýle hem, Türkmenistanyň Daşary işler ministrliginiň Halkara gatnaşyklary institutynyň okuw işleri boýunça prorektory Gülşat Ýusupowa, institutyň Halkara gatnaşyklary we diplomatiýa kafedrasynyň uly mugallymy, f.y.k. Begenç Karaýew we talyplar gatnaşýarlar. Maslahatda Aziýanyň geosyýasy ösüşi, ösüp barýan Aziýanyň geosyýasatynda esasy iki sebitleýin ulgamlar bolan Merkezi Aziýanyň we Owganystan-Päkistanyň orny, sebitiň syýasy geografiýasynda global meseleler barada özara pikir alyşyldy.
Türkiýe Respublikasynyň Ankara krizis we syýasat gözlegleri merkeziniň (ANKASAM) esasy ugry halkara gatnaşyklarynyň çäklerinde Aziýanyň geografiýasy bolup durýar. ANKASAM-yň düzüminde Owganystan-Päkistan (AF-PAK), Aziýa-Ýuwaş umman, Merkezi Aziýa, Russiýa-Kawkaz ýaly 4 sany sebit instituty hereket edýär. Häzirki döwürde halkara syýasatynda, ykdysady ulgamda, geomedeni gurluşda bolup geçýän üýtgeşmeleriň netijesinde Aziýanyň geosyýasaty uly ähmiýete eýe bolýar. Bütin dünýäde öňe sürýän parahatçylykly ýörelgeleri bilen ylalaşdyryjy merkez hökmünde tanalýan Türkmenistan Merkezi Aziýa sebitinde möhüm orun eýeleýär. Munuň şeýledigine Aşgabatda ýerleşýän Birleşen Milletler Guramasynyň Merkezi Aziýada Öňüni alyş diplomatiýasy boýunça Sebit merkezi hem aýdyň şaýatlyk edýär.
Iki gün dowam edýän maslahat 2021-nji ýylyň 23-nji maýynda öz işini tamamlar.
Laçyn BERDIMYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň talyby.