Amerikan wekili bilen täsirli geçen duşuşyk
2024-nji ýylyň 15-nji aprelinde Türkmenistanyň Daşary işler ministrliginiň Halkara gatnaşyklary institutynda Amerikanyň Birleşen Ştatlarynyň Döwlet Sekretarynyň Günorta we Merkezi Aziýa işleri boýunça kömekçisiniň orunbasary Jon Pommerşaýmyň ýolbaşçylygyndaky wekiliýetiniň agzasy bolan, ABŞ-nyň Prezidentiniň Diwanynyň Howpsuzlyk geňeşiniň Merkezi Aziýa bölüminiň müdiri, Professor Brianna Todd bilen talyp ýaşlaryň gatnaşmagynda duşuşyk geçirildi.
Duşuşygyň barşynda Professor Brianna Todd türkmen-amerikan dostlukly gatnaşyklarynyň taryhy, ýeten sepgidi we häzirki wagtdaky ösüşi barada giňişleýin aýdyp berdi. Şeýle-de, iki döwletiň ykdysady, ekologiýa, medeniýet, ylym-bilim pudaklaryndaky gatnaşyklaryna aýratyn üns çekip, olaryň geljegi barada öz pikirini beýan etdi. Duşuşygyň ahyrynda talyplar aýdylan zatlar boýunça özlerini gyzyklandyrýan meseleler barada giňişleýin jogap aldylar.
Duşuşykdan soňra myhman institutyň türkmen diplomatiýasynyň taryhy muzeýi bilen ýakyndan tanyş boldy.
Gülruh GELDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III talyby.