Albukerkede Aşgabat şäheriniň güni
2021-nji ýylyň 24-nji maýynda Türkmenistanyň Daşary işler ministrliginiň Halkra gatnaşyklary institutynda, 25-nji maý – Albukerkede (Nýu-Meksiko ştaty, ABŞ) Aşgabat şäheriniň güni diýlip yglan edilmegi mynasybetli “Aşgabat – Albukerke doganlaşan şäherler” atly tegelek stol maslahaty geçirildi. Aşgabat şäheriniň döredilmeginiň 140 ýyllygyna bagyşlanyp kabul edilen Jarnama, paýtagtymyzyň doganlaşan şäherleriniň biri bolan, Albukerke bilen ýokary derejeli gatnaşyklaryň saklanýandygynyň subutnamasydyr.
Tegelek stol maslahatyny Türkmenistanyň Daşary işler ministrliginiň Halkra gatnaşyklary institutynyň rektory Jumamyrat Gurbangeldiýew alyp bardy. Maslahat Halkara ynsanperwer ylymlary we ösüş uniwersitetiniň rektory Esen Aýdogdyýewiň, ABŞ-nyň Türkmenistandaky Adatdan daşary we Doly ygtyýarly ilçisi Metýu Klimowyň, ABŞ-nyň Türkmenistandaky ilçihanasynyň medeniýet we okuw işleri bölüminiň başlygy hanym Jaklin Muryň, Aşgabat şäher häkiminiň orunbasary Merjen Geldiýewanyň gatnaşmagynda geçirildi.
ABŞ-nyň Aşgabat-Albukerke doganlaşan şäherler komitetiniň düýbüni tutujy we ilkinji başlygy Sally Elis Tompson we ABŞ-nyň Aşgabat-Albukerke doganlaşan şäherler komitetiniň başlygy Alan MakGrattan wideoaragatnaşyk arkaly maslahata gatnaşyjylara gutlag sözlerini iberdiler. Duşuşygyň ahyrynda maslahata gatnaşyjylara Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň talyplary tarapyndan taýýarlanan Aşgabat we Albukerke doganlaşan şäherleri barada wideoroligi hödürlendi.
Iki dogan şäheriň ýaşaýjylarynyň köp umumy gymmatlyklary bar. Soňky onýyllyklarda doganlaşan şäherler özara hyzmatdaşlygy ösdürýärler we medeniýet, bilim, saglygy goraýyş, tehnologiýa, sport, şäher gurluşygy we ş.m. dürli ugurlarda tejribe alyşýarlar. Gatnaşanlaryň belleýşi ýaly, bu çäre Türkmenistan bilen Amerikanyň Birleşen Ştatlarynyň arasynda dostlukly gatnaşyklaryň ösmegine goşant goşar.
Jemal REMATULLAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 3-nji ýyl talyby.