Akyl - paýhas bäsleşigi geçirildi
2023-nji ýylyň 20-nji oktýabrynda Türkmenistanyň Daşary işler ministrliginiň Halkara gatnaşyklary institutynda Birleşen Milletler Guramasynyň gününe bagyşlanyp, institutyň talyplarynyň arasynda akyl- paýhas bäsleşigi geçirildi.
Bäsleşik 4 sany tapgyrdan ybarat bolup, olarda BMG-niň gurluşynyň esasy aýratynlyklary, guramanyň edaralarynyň işiniň tertibi we Türkmenistan bilen alyp barýan hyzmatdaşlygy barada soraglar berlip, talyplaryň bilesigelijiligini has-da artdyrdy. Bäsleşigiň iňlis dilinde geçirilmegi bolsa talyplara bu ugurda bilimlerini kämilleşdirmäge kömek etdi. Çekeleşikli geçen bäsleşigiň netijelerine laýyklykda, Halkara gatnaşyklary fakultetiniň talyplary I orna, Halkara žurnalistikasy fakultetiniň talyplary II orna, Halkara ykdysady gatnaşyklary fakultetiniň talyplary bolsa III orna mynasyp boldular.
Mälim bolşy ýaly, her ýylyň 24-nji oktýabrynda bellenilýän Birleşen Milletler Guramasynyň güni (BMG güni) 1947-nji ýylyň oktýabr aýynda BMG-niň Baş Assambleýasynyň karary bilen yglan edildi we 1945-nji ýylda BMG-niň Tertipnamasynyň güýje girmegi bilen bellenilip başlandy.
Maral KARLYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.