Ählihalk bag ekmek dabarasy geçirildi
2024-nji ýylyň 9-njy noýabrynda ýurdumyzda ählihalk bag ekmek dabarasy geçirilip, bu asylly işe Türkmenistanyň Daşary işler ministrliginiň Halkara gatnaşyklary institutynyň mugallymlarydyr talyplary hem işjeň gatnaşdylar. Munuň özi ýurdumyzy bagy-bossanlyga öwürmek boýunça maksatnamanyň üstünlikli durmuşa geçirilýändiginiň aýdyň subutnamasydyr.
Mälim bolşy ýaly, ata-babalarymyzdan miras galan daşky gurşawa aýawly garamak ýaly milli däplerimiz häzirki günde aýratyn uly ähmiýete eýedir. Her ýyl ýurdumyzda ählihalk bag ekmek dabaralary geçirilip, dürli görnüşli bag nahallarynyň ýüz müňlerçesi ekilýär. Olaryň ösüp ulalmagy bilen, türkmen topragy bagy-bossanlyga bürenip, halkymyzyň tebigata bolan söýgüsini has-da artdyrýar.
Ýurdumyzda ekologik abadançylygy üpjün etmek, Howanyň üýtgemegi barada Milli strategiýada we Milli tokaý maksatnamasynda öňde goýlan wezipeleri üstünlikli durmuşa geçirmek boýunça yzygiderli işler amala aşyrylýar.
Ýurdumyzyň ähli ýerinde bag nahallaryny ekmek bilen bir hatarda, ozal ekilen hem-de boý alan baglara ideg etmek işleri hem geçirildi. Şunuň bilen baglylykda, şu gezekki ählihalk bag ekmek dabarasynda institutymyzyň mugallymlarydyr talyplary Türkmenistanyň Daşary işler ministrliginiň hem-de institutymyzyň çäklerinde bag nahallaryny oturtdylar. Şeýle-de ekilen bag nahallaryna talabalaýyk ideg işleri edildi. Ýokary ruhubelentlikde geçirilen ählihalk bag ekmek dabarasy ýurdumyzyň ähli künjeginde giňden ýaýbaňlandyryldy.
Atamyrat ÝAZWELIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.