Adam hukuklarynyň halkara güni mynasybetli mekdep okuwçylary bilen geçirilen duşuşyk
Ýetmiş üç ýyl mundan ozal, hut şu gün adamyň hukuklary we azatlyklary hakynda Ählumumy Jarnama kabul edildi. Jarnama Birleşen Milletler Guramasynyň Baş Assambleýasy tarapyndan 1948-nji ýylyň 10-njy dekabrynda ähli döwletleriň we halklaryň berjaý edilmeli ýörelgeleriniň resminamasy hökmünde kabul edildi. Adam hukuklarynyň berjaý edilmegi boýunça ara alnyp maslahatlaşylýan halkara derejedäki konwensiýalar ýaly birnäçe resmi çäreler BMG-niň wekilleri we şertnama gol çeken döwletler tarapyndan gurnalýar.
Bu taryhy günde, ýurdumyzyň dürli künjeklerinde adamyň hukuklaryny we azatlyklaryny düşündirýän okuw seminarlarydyr, bäsleşikler geçirilýär. Muňa mysal edip, Ýewropada Howpsuzlyk we Hyzmatdaşlyk Guramasynyň gurnamagynda hukukçy talyplar üçin wideoaragatnaşyk arkaly okuw seminarlarynyň geçirilmegi, şeýle hem institutymyzyň Halkara hukugy fakultetiniň “Ýaş hukukçylar” ylmy gurnagynyň agzalarynyň gurnamagynda adamyň esasy hukuklaryny we azatlyklaryny düşündirmek maksady bilen orta mekdep okuwçylary bilen duşuşyk maslahaty geçirildi. Bu maslahatyň dowamynda her bir adamyň şahsy durmuşynyň eldegrilmesizligi, adamyň syýasy, ykdysady we medeni hukuklary dogrusynda gurnagyň agzalary tarapyndan wideorolikler we prezentasiýalar arkaly düşündirildi.
Bu taryhy gün şu güne çenli adamyň hukuklarynyň we azatlyklarynyň zerurlygynyň ähmiýetini ýitirmän gelýär. Bu Jarnama dünýäniň 500 diline terjime edilip, adalatyň ýerine ýetirilmegini talap edýär, şeýle hem adamyň esasy hukuklarynyň we azatlyklarynyň birnäçe talaplarynyň bardygyny belleýär.
Adam hukuklary baradaky mesele halkara hukugynda garalýan iň wajyp meseleleriň biridir. Adam hukuklary bu her bir adamyň jemgyýetde erkin, rahat we abadan ýaşamagy we durmuş gurmagy, jemgyýet we döwlet işlerine işeňňir gatnaşmaklary üçin zerur bolan hukuklarynyň we azatlyklarynyň jemidir.
Dürli BALLYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk
öwreniş kafedrasynyň mugallymy