ADAM HUKUKLARY BOÝUNÇA BÄSLEŞIK GEÇIRILDI
2025-nji ýylyň 18-nji dekabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Döwlet, hukuk we demokratiýa instituty, Türkmenistanyň Adalatçysynyň edarasy hem-de Ýewropa Bileleşiginiň Türkmenistandaky wekilhanasy bilen bilelikde adam hukuklary boýunça talyplaryň arasynda bäsleşik geçirildi. Bu bäsleşige Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň hem-de Türkmenistanyň Daşary işler ministrliginiň Halkara gatnaşyklary institutynyň talyplary gatnaşdylar.
Bäsleşik üç tapgyrda çekeleşikli geçirilip, Adam hukuklarynyň güni bilen baglanyşykly, şeýle-de adam hukuklary bilen bagly meseleleri seljermäge degişli soraglar berildi. Netijede Magtymguly adyndaky Türkmen döwlet uniwersitetiniň talyplary ýeňiş gazandylar. Bäsleşige gatnaşan talyplara ýadygärlik sowgatlary gowşuryldy.
Bäsleşigiň ahyrynda oňa gatnaşyjylar ýaşlar baradaky aladalary üçin Gahryman Arkadagymyza we Arkadagly Gahryman Serdarymyza öz minnetdarlyklaryny bildirdiler.
Merjen GURBANNAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk öwreniş
kafedrasynyň uly mugallymy.