«Abadançylygyň röwşen gadamlary» rus we iňlis dillerinde neşir edildi
2022-nji ýylyň 14-nji martynda Türkmenistanyň Daşary işler ministrliginiň Halkara gatnaşyklary institutynda hormatly Prezidentimiziň «Abadançylygyň röwşen gadamlary» kitabynyň rus we iňlis dillerindäki neşirleriniň tanyşdyrylyş dabarasy boldy. Dabara Daşary işler ministrliginiň ýolbaşçylary we hünärmenleri, daşary ýurtlaryň we halkara guramalaryň Türkmenistandaky hemişelik wekilhanalarynyň ýolbaşçylary, ýurdumyzyň köpçülikleýin habar beriş serişdeleriniň wekilleri, käbir ýokary okuw mekdepleriniň hem-de biziň institutymyzyň professor-mugallymlarydyr talyp ýaşlary, syýasatşynaslar gatnaşdylar.
Tanyşdyrylyş dabarasynyň başynda Türkmenistanyň Ministrler Kabinetiniň Başlygynyň orunbasary, Daşary işler ministri Raşid Meredowyň çykyşy diňlenildi. Daşary işler ministri öz çykyşynda milli Liderimiziň ýurdumyzyň halkara giňişligindäki abraýyny pugtalandyrmak barada edýän tagallalary, hususan-da, şeýle işleriň aýdyň subutnamasy bolan «Abadançylygyň röwşen gadamlary» atly kitabyň giň okyjylar köpçüligine eýe bolan rus we iňlis dillerine terjime edilmeginiň ähmiýeti dogrusynda giňişleýin gürrüň berdi. Soňra Russiýa Federasiýasynyň Türkmenistandaky Adatdan daşary we Doly ygtyýarly Ilçisi Aleksandr Blohin çykyş edip, Türkmenistanyň Prezidenti Gurbanguly Berdimuhamedowyň 2021-nji ýyldaky möhüm ähmiýetli syýasy wakalar bolan Merkezi Aziýanyň döwlet Baştutanlarynyň konsultatiw duşuşygynyň, Şanhaý Hyzmatdaşlyk Guramasynyň, Ykdysady Hyzmatdaşlyk Guramasynyň, Türki dilli döwletleriň hyzmatdaşlyk guramasynyň hem-de Garaşsyz Döwletleriň Arkalaşygynyň sammitlerinde eden taryhy çykyşlaryny özünde jemleýän «Abadançylygyň röwşen gadamlary» kitabyň rus diline terjime edilmeginiň russiýaly okyjylara Türkmenistanyň alyp barýan hoşniýetli daşary syýasaty bilen ýakyndan tanyşmaga ýardam etjekdigini aýratyn nygtady.
Şeýle-de dabaranyň dowamynda Halkara ynsanperwer ylymlary we ösüş uniwersitetiniň rektory Esen Aýdogdyýew, Watikanyň Türkmenistandaky Apostol Nunsiaturasynyň medeniýet meseleleri boýunça attaşesi Anjeý Madeý, Belarus Respublikasynyň Türkmenistandaky Adatdan daşary we Doly ygtyýarly Ilçisi Wýaçeslaw Beskostyý, Türkmenistanyň Daşary işler ministrliginiň Halkara gatnaşyklary institutynyň rektory Jumamyrat Gurbangeldiýew, Döwletmämmet Azady adyndaky Türkmen milli dünýä dilleri institutynyň rektory Maral Kuliýewa dagy çykyş etdiler. Çykyşlarda hormatly Prezidentimiziň parasatly baştutanlygynda hemişelik Bitarap döwletimiziň halkara gatnaşyklarynda gazanýan üstünlikleri, Türkmenistanyň sebitde we dünýäde hoşmeýilli gatnaşyklary ösdürmekde eýeleýän wajyp orny, türkmen diplomatiýasynyň iň asylly däplerini özünde jemleýän bu neşiriň rus we iňlis dillerine terjime edilmeginiň derwaýyslygy barada giňişleýin durlup geçildi. Dabaranyň ahyrynda oňa gatnaşyjylar Türkmenistanyň Prezidenti hormatly Gurbanguly Berdimuhamedowyň adyna Ýüzlenme kabul etdiler.
Batyr KAIROW,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň mugallymy.
Şeýle hem bu barada şu ýerde okap bilersiňiz :