2023-nji ÝYLY — «PARAHATÇYLYGYŇ KEPILI HÖKMÜNDE DIALOGYŇ HALKARA ÝYLY» DIÝLIP YGLAN EDILMEGI MYNASYBETLI MASLAHAT GEÇIRILDI
2023-nji ýylyň 27-nji ýanwarynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Daşary işler ministrliginiň gurnamagynda 2023-nji ýyly — «Parahatçylygyň kepili hökmünde dialogyň halkara ýyly» diýlip yglan edilmegi mynasybetli maslahat geçirildi. Bu dabara Birleşen Milletler Guramasynyň we onuň ulgamynyň ýokary derejeli wekilleri hem-de oňa agza döwletleriniň wekilleri sanly ulgam arkaly, şeýle hem ýurdumyzyň ýokary okuw mekdepleriniň professor-mugallymlary we talyp ýaşlary gatnaşdylar.
Dabaraly maslahatda BMG-niň Baş Assambleýasyndan, BMG-niň Ženewadaky edarasyndan, BMG-niň Ýewropa ykdysady komissiýasyndan, Halkara Zähmet Guramasynyň Gündogar Ýewropa we Merkezi Aziýa ýurtlary boýunça Moskwadaky edarasyndan, ÝUNESKO-nyň we ÝUNISEF-iň düzüminden, Halkara Migrasiýa Guramasyndan wekiller hem-de beýleki abraýly halkara guramalaryndan wekiller sanly ulgam arkaly çykyş etdiler.
Şeýle-de bu dabaraly maslahatda Goşulyşmazlyk Hereketinden, BMG-niň Merkezi Aziýa üçin Öňüni alyş diplomatiýasy boýunça sebit merkezinden, BMG-niň Ösüşi utgaşdyryş edarasyndan, Ýewropada Howpsuzlyk we Hyzmatdaşlyk Guramasyndan hem-de Eýran Yslam Respublikasynyň, Gazagystan Respublikasynyň, Nikaragua Respublikasynyň BMG-däki hemişelik wekilleri we beýlekiler çykyş etdiler.
Mälim bolşy ýaly, 2022-nji ýylyň 6-njy dekabrynda geçirilen BMG-niň Baş Assambleýasynyň 77-nji sessiýasynyň 45-nji plenar mejlisinde Türkmenistanyň başlangyjy boýunça “2023-nji ýyl — Parahatçylygyň kepili hökmünde dialogyň halkara ýyly” atly Kararnama kabul edildi. Bu çözgüde gurama agza ýurtlaryň 68-si awtordaş bolup çykyş etdi. “Dialog — parahatçylygyň kepili” atly ählumumy başlangyç dünýä halklarynyň parahatçylyk we birek-birege ynanyşmak ýörelgelerine esaslanýan däp-dessurlaryny berkitmekde, milli gymmatlyklary we oňyn garaýyşlary ösdürmekde halkara bileleşigiň tagallalarynyň utgaşdyrylmagyna gönükdirilendir.
Maslahatda çykyş edenler hormatly Prezidentimiziň alyp barýan içeri syýasatynyň we hemişelik Bitaraplyk ýörelgämize daýanýan daşary syýasatymyzyň sazlaşmagynda milli ösüşlerimiziň halkara derejesinde nusgalyk ösüşlere öwrülýändigini, halkymyzyň durmuş, hal-ýagdaýyny barha ýokarlandyryp, berkararlyk binýadymyzy has-da berkidýändigini nygtap geçdiler.
Halkymyzyň bagtyýar durmuşda ýaşamagy, ata Watanymyzyň gülläp ösmegi, berkarar türkmen döwletiniň dowamatynyň dowam bolmagy ugrunda nusgalyk işleri durmuşa geçirýän Gahryman Arkadagymyzyň, Arkadagly Serdarymyzyň janlary sag, ömürleri uzak, ähli tutumly işleriniň rowaç bolmagyny arzuw edýäris!
Merjen DURDYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme
hukuk
öwreniş kafedrasynyň mugallymy.
Şeýle hem bu barada şu ýerden okap bilersiňiz: