ÝUNESKO tarapyndan gowşurylan Gutlag haty
Türkmenistanyň ykdysadyýetini hil taýdan täze derejä çykarmak üçin möhüm şert, häzirki zaman innowasiýa tehnologiýalarynyň we öňdebaryjy ylmy üstünlikleriň durmuşa geçirilmeginde jemgyýetiň intellektual kuwwatyndan peýdalanmakdyr. Şonuň üçin döwletiň durmuş-ykdysady ösüşi düşünjesinde täsirli tehnologiýalarda birleşdirilen çuňňur ylmy we teoretiki bilimlere we giň tejribelere esaslanýan innowasiýa ykdysadyýetine esasy orun berilýär. Bu nukdaýnazardan, türkmen halkynyň Milli lideriniň "Ylym döwletiň güýji" diýip aýdan sözleri ylym we bilim pudagynda döwlet syýasatynyň umumy setiriniň dowamy bolup durýar.
Global ylmy giňişlige üstünlikli goşulan Türkmenistan häzirki wagtda innowasiýa we tehnologiýa taýdan sazlaşykly ösýän ýurda öwrülýär. Ultra-döwrebap maglumat we aragatnaşyk tehnologiýalaryny, dürli akylly ulgamlary we alternatiw energiýany ornaşdyrmak bilen geljegi uly ilkinji “akylly şäheriň” durmuşa geçirilmegi muňa aýdyň mysal boldy.
Köpetdagyň gözel künjeginde ak binalary lowurdap duran geljegiň şäheri adyny alan akylly şäheriň peýda bolmagy ýurdumyzyň durmuş ulgamynyň toplumlaýyn döwrebaplaşdyrylýandygynyň aýdyň subutnamasydyr. Türkmen halkynyň Milli Lideri Gahryman Arkadagymyzyň adyny göterýän Arkadag şäheriniň desgalary gurlanda innowasion tehnologiýalar we sanly ulgamlar işjeň ulanyldy. Döwür bilen deň gadam urmak üçin hökmany şertleriň biri bolup durýan ekologiýa, durmuş we ykdysady durnuklylygy doly derejede üpjün edildi.
Arkadag şäherine ÝUNESKO-nyň Bilim ulgamynda maglumat tehnologiýalary boýunça institutynyň Arkadag şäherinde Türkmenistanyň sanly ykdysadyýetine we durnukly ösüşine goşant goşjak täze sanly bilim ulgamynyň üstünlikli durmuşa geçirilmegi mynasybetli Gutlag hatynyň gowşurylmagy şäherde alnyp barylýan işleriň ählisiniň halkara ykrarnama eýe bolandygyna şaýatlyk edýär. Türkmenistanda ilkinji «akylly şäheriň» açylyşy mynasybetli dabaralara köp sanly daşary ýurtly myhmanlar gatnaşyp, şäheriň gurluşyk, binagärlik, bezeg, logistika, tehnologik çözgütlerine, durmuş derejesine ýokary baha berdiler.
Hormatly Prezidentimiziň ylym we intellektual pudagynda innowasiýa özgertmelerini üstünlikli durmuşa geçirmegi netijesinde, biziň ýurdumyz bu ugurda halkara guramalary, esasanam ÝUNESKO, BMG-nyň bilim, ylym we medeniýet pudagyndaky ýörite guramasy bilen hyzmatdaşlygy artdyrýar. Bu ugurdaky hyzmatdaşlyk bilelikdäki taslamalar we maksatnamalar esasynda güýçlendirilýär.
Bilşimiz ýaly, ÝUNESKO dünýäniň köp ýurtlaryna ylma maýa goýmak, ylmy ulgamlary özgertmek, ylym pudagyndaky halkara öňdebaryjy tejribe barada iň täze we doly maglumat bermek üçin kömek edýär.
Türkmenistan bilen ÝUNESKO-nyň arasyndaky hyzmatdaşlygyň esasy ugurlarynyň biri hem, ylmy we bilimi ösdürmek, hyzmatlary bermek we ösüşi giňeltmek üçin güýçli gural bolan maglumat we aragatnaşyk, innowasiýa we sanly tehnologiýalar ýaly geljegi uly ylmy pikirleri we taslamalary durmuşa geçirmekdir. Ylmy täze, has ýokary derejelere çykarmak ýurdumyzyň tehniki we ykdysady mümkinçiliklerini hasam artdyrar, türkmen halkynyň medeni derejesiniň we abadançylygynyň ösmegine mümkinçilik döreder.
Häzirki wagtda Türkmenistanda amala aşyrylýan, türkmen halkynyň şöhratly taryhyny we baý medeniýetini öwrenmäge, onuň maddy, ruhy mirasyny aýawly saklamaga hem-de wagyz etmäge ýardam edýän giň gerimli özgertmeler oňyn orny eýeleýär.
Döwlet Baştutanymyz tarapyndan öňe sürülýän ýurdumyzyň taryhy-medeni ýadygärlikleriniň halkara derejesini beýgeltmäge gönükdirilen oňyn başlangyçlary ÝUNESKO-nyň we bu guramanyň ähli agza ýurtlarynyň giň goldawyna mynasyp bolýar. Bularyň ählisi hormatly Arkadagymyzyň, Arkadagly Serdarymyzyň türkmen halkynyň we tutuş adamzadyň belent ýörelgeleriniň dabaralanmagynyň bähbidine gönükdirilen medeni we ylmy diplomatiýasynyň üstünliklere beslenýändiginiň aýdyň güwäsidir.
Aýgözel AŞIROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary we diplomatiýa kafedrasynyň öwreniji mugallymy.