«Türkmenistanyň parahatçylygyň we ösüşiň ugrunda halkara sport hyzmatdaşlygy» atly tegelek-stol maslahaty geçirildi
2024-nji ýylyň 30-njy aprelinde Türkmenistanyň Daşary işler ministrliginiň Halkara gatnaşyklary institutynda Türkmenistanyň bedenterbiýe we sport baradaky döwlet komiteti, Türkmen Döwlet bedenterbiýe we sport instituty, Türkmenistanyň Döwlet çeperçilik akademiýasy, Aba Annaýew adyndaky Halkara atçylyk akademiýasy, Türkmenistanyň Daşary işler ministrliginiň Halkara gatnaşyklary instituty bilen bilelikde «Türkmenistanyň parahatçylygyň we ösüşiň ugrunda halkara sport hyzmatdaşlygy» atly tegelek-stol maslahaty geçirildi. Dabaraly maslahatyň çäklerinde sport ulgamynda gazanylan üstünliklere bagyşlanan sergi hem gurnaldy.
Maslahatda çykyş edenler Türkmenistanyň häzirki wagtda ösen sport ulgamly, dünýä derejesindäki ýaryşlary üstünlikli geçirmekde ähmiýetli tejribesi bolan, halkara sport hyzmatdaşlygy ulgamyna işjeň gatnaşýan ýurt bolup durýandygy we muňa mysal edip, Merkezi Aziýa sebitinde deňi-taýy bolmadyk paýtagtymyzyň Olimpiýa şäherçesini, 2017-nji ýylda üstünlikli geçirilen Ýapyk binalarda we söweş sungaty boýunça V Aziýa oýunlaryny, şeýle-de 2018-nji ýylda geçirilen “Amul-Hazar 2018” halkara awtorallisini we agyr atletika boýunça Dünýä çempionatyny hem-de beýleki halkara derejedäki ýaryşlarda baýrakly orunlaryň eýesi bolýandyklary barada gürrüň berdiler.
Çykyşlaryň dowamynda «Pähim-paýhas ummany Magtymguly Pyragy» ýylymyzyň 15 — 20-nji apreli aralygynda paýtagtymyz Aşgabat şäherindäki Gyşky oýunlar sport toplumynda Hokkeý boýunça halkara ýaryşynda Türkmenistanyň «Galkan» topary birinji orna mynasyp bolmagy hormatly Prezidentimiziň baştutanlygynda ýurdumyzda bedenterbiýäni we sporty ösdürmek boýunça amala aşyrylýan işleriň barha rowaçlanýandygynyň aýdyň subutnamasy bolup, bu ýaryş halklaryň arasyndaky dostlugy, doganlygy, hoşniýetli goňşuçylygy mundan beýläk-de pugtalandyrmaga, jemgyýetde sagdyn durmuş ýörelgelerini işjeň ornaşdyrmaga, ösüp gelýän ýaş nesli sport bilen meşgullanmaga giňden çekmekde möhüm itergi bolandygy barada gürrüň edildi.
Maslahatda çykyş edenler sport diplomatiýasynyň barha rowaçlanmagyna giň mümkinçilikleri döredip berýän Gahryman Arkadagymyza, Arkadagly Gahryman Serdarymyza köp sagbolsun aýtdylar.
Ogulmaýsa AMANMUHAMMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Žurnalistikanyň nazaryýeti we amalyýeti kafedrasynyň mugallymy.