Türkmenistan — Eýran: ykdysady hyzmatdaşlyk pugtalandyrylýar
Häzirki wagtda Garaşsyz, baky Bitarap Türkmenistan döwletimiz dünýäniň ençeme ýurtlary bilen ykdysadyýetiň ähli pudaklarynda, ugurlarynda işjeň hyzmatdaşlyk alyp barýar. Türkmen halkynyň Milli Lideri Gahryman Arkadagymyzyň, Arkadagly Gahryman Serdarymyzyň oýlanşykly daşary syýasyaty netijesinde, bu günki gün ýurdumyzyň at-abraýy has-da belende göterilýär. Milli ykdysadyýetimiziň gazananlaryny dünýä ýaýmak maksady bilen milli, halkara sergiler, forumlar, maslahatlar geçirilýär. Şol sanda ýurdumyzda daşary ýurtlaryň ençemesiniň milli önümlerini, hödürleýän hyzmatlaryny tanyşdyrmak maksatly halkara sergiler we olaryň çäklerinde maslahatlardyr çäreler geçirilýär.
Mälim bolşy ýaly, 2023-nji ýylyň 17 — 19-njy noýabr aralygynda türkmen paýtagty Aşgabat şäherinde ýerleşýän Türkmenistanyň Söwda-senagat edarasynda «Iran Project» atly eýran önümleriniň sergisi geçirildi. Oňa eýran kompaniýalarynyň 100-den gowragy gatnaşyp, özleriniň alyp barýan işleridir hyzmatlary bilen bu ýere ýygnananlary tanyşdyrdylar.
Ykdysady gözden geçiriliş bilen ugurdaşlykda iki dostlukly ýurduň arasyndaky ykdysady gatnaşyklary pugtalandyrmak we mundan beýläk-de ösdürmek maksady bilen, ykdysady hyzmatdaşyk boýunça türkmen-eýran Hökümetara toparynyň 17-nji mejlisi geçirildi. Mejlisiň dowamynda taraplar ulag-üstaşyr, logistika, energetika, gaz, söwda, maýa goýum, gümrük, bank, maliýe, syýahatçylyk, saglygy goraýyş, şeýle-de oba hojalyk pudaklarynda ikitarplaýyn gatnaşyklary has-da ösdürmek bilen bagly meseleleri ara alyp maslahatlaşdylar.
Eýran önümlerine bagyşlanan serginiň çäklerinde geçirilen mejlisiň netijeleri boýunça Ykdysady hyzmatdaşlyk boýunça türkmen-eýran Hökümetara toparynyň 17-nji mejlisiniň Teswirnamasyna; Mary (Türkmenistan) — Maşat (Eýran) elektrik geçirijisiniň türkmen böleginiň gurluşygynyň maliýeleşdirilmegini ýola goýmak hakynda «Türkmenenergo» döwlet elektroenergetika korporasiýasynyň, «Tawanir» kompaniýasynyň we «Sanergy Pishro Export and Energy Promotion» kompaniýasynyň arasynda Çarçuwaly ylalaşyga; Awtomobil ýollarynyň gurluşygyny dolandyrmak baradaky döwlet agentligi bilen Eýran Yslam Respublikasynyň Ýol we şäher gurluşyk ministrliginiň arasynda «Gumdag-Etrek-Eýran serhedi» awtomobil ýoluny gurmak barada Hyzmatdaşlyk hakynda Ähtnama gol çekildi.
Bellenilişi ýaly, soňky ýyllarda Türkmenistan bilen Eýran Yslam Respublikasynyň arasynda ykdysadyýetiň ähli ugurlarydyr pudaklarynda netijeli işler durmuşa geçirilýär. Dostlukly ýurtlaryň arasyndaky hyzmatdaşlygyň barha pugtalanmagy bilen bagly ýurt, sebit, dünýä ähmiýetli birnäçe ylalaşyklar gazanylýar. Ine, bu gezekki gol çekilen resminamalaryň hem türkmen-eýran gatnaşyklarynyň täze sahypasynyň esasyny düzjekdigi ikuçsyzdyr.
Sülgün NEPESOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary kafedrasynyň mugallymy.