Şanly ýylymyza sowgat
Belent maksatlar bilen gadam basan 2024-nji ýylymyzyň «Pähim-paýhas ummany Magtymguly Pyragy» ýyly diýlip yglan edilmegi beýik başlangyçlaryň dabaralanmasy boldy. Beýik filosof we söz ussady Magtymguly Pyragynyň döredijiliginiň dünýä dolan şöhratyny has-da beýgeltmek we ony giňden wagyz etmek, bu ugurda halkara hyzmatdaşlygy pugtalandyrmak boýunça ýurdumyzda giň gerimli işler alnyp barylýar.
Şunuň bilen baglylykda, ýakynda Türkmenistanyň Daşary işler ministrliginiň Halkara gatnaşyklary instituty tarapyndan Magtymguly Pyragynyň doglan gününiň 300 ýyllygy mynasybetli «Magtymguly Pyragynyň umumadamzat ähmiýetli parahatçylyk taglymaty we häzirki zamanyň möhüm meseleleri» atly ylmy makalalaryň ýygyndysy neşir edildi. Täze neşir Magtymguly Pyragynyň doglan gününiň 300 ýyllygynyň dünýä derejesinde giňden dabaralandyryljak ýylynda diňe bir ylmy jemgyýetçilik däl, eýsem, ähli halkymyz üçin ajaýyp sowgatdyr.
Üç bölümden ybarat bolan bu kitaba ýurdumyzyň ýokary okuw mekdepleriniň professor-mugallymlarynyň, alymlaryň ylmy makalalary, seljermeleri girizildi. Birinji bölümde ýerleşdirilen materiallarda Magtymgulynyň jemgyýetçilik-syýasy garaýyşlary öwrenilýär, şahyryň döwrüniň wakalary seljerilýär, olar döredijilik eserlerinde şöhlelendirilýär. Ýygyndynyň ikinji bölüminde awtorlar öz makalalarynda şahyryň eseriniň filosofiki, terbiýeçilik-ahlak taýdan we ahlak kadalar taraplaryny açyp görkezýärler we derňeýärler. Üçünji bölümde alymlar we mugallymlar Magtymguly Pyragynyň adamzat üçin hakyky baýlygy we mirasy düzýän goşgularyny açyp görkezýärler.
Häzirki wagtda Gündogaryň beýik akyldary we şahyry Magtymguly Pyragynyň doglan gününiň 300 ýyllygyny dünýä derejesinde giňden belläp geçmäge taýýarlyk görülýär. Bu möhüm çäräni halkara jemgyýetçilik bilen bilelikde dabaralandyrmak babatda durmuşa geçirilýän işler akyldar şahyrymyzyň gymmatly edebi mirasyny öwrenmekde möhüm ähmiýete eýe bolup durýar. Bu babatda beýik işlere badalga berip, milli mirasymyzy, edebiýatymyzy dünýä derejesinde şöhratlandyrýan türkmen halkynyň Milli Lideri Gahryman Arkadagymyzyň hem-de Arkadagly Gahryman Serdarymyzyň janlary sag bolsun, beýik işleri üstünliklere beslensin!
Ogulmaýsa AMANMUHAMMEDOWA,
Türkmenistanyň Daşary işler ministrliginiň
Halkara gatnaşyklary institutynyň žurnalistikanyň
nazaryýeti we amalyýeti kafedrasynyň mugallymy.