Pars diline terjime
1-nji sentýabrda Türkmenistanyň Daşary işler ministrliginiň Halkara gatnaşyklary institutynda türkmen halkynyň Milli Lideri Gahryman Arkadagymyzyň «Enä tagzym — mukaddeslige tagzym» atly kitabynyň pars diline terjime edilmegi mynasybetli dabaraly maslahat geçirildi.
Ýurdumyzyň jemgyýetçilik guramalarynyň, ýokary okuw mekdepleriniň, gazet-žurnallaryň ýolbaşçylary, Eýran Yslam Respublikasynyň Türkmenistandaky ilçihanasynyň wekilleri, Aşgabat we Arkadag şäherlerinden hem-de ýurdumyzyň welaýatlaryndan kümüş saçly eneler we zenanlar, köpçülikleýin habar beriş serişdeleriniň wekilleri hem-de institutymyzyň mugallymlarydyr talyp ýaşlary gatnaşdylar.
Dabaraly maslahatyň başynda Beýik Saparmyrat Türkmenbaşy adyndaky Baş akademiki drama teatrynyň artistleri tarapyndan «Ene — zemin mukaddesligi» atly edebi-sazly kompozisiýasy ýerine ýetirildi.
Soňra maslahat çykyşlar bilen dowam etdi. Çykyş edenler türkmen halkyny, Gahryman Arkadagymyzy, Arkadagly Gahryman Serdarymyzy «Enä tagzym — mukaddeslige tagzym» atly kitabynyň pars dilinde okyjylara gowuşmagy bilen tüýs ýürekden gutladylar. Çykyşlarda türkmen halkynyň Milli Lideri Gurbanguly Berdimuhamedowyň Eýran Yslam Respublikasyna amala aşyran iş saparynyň çäklerinde ýurduň Prezidenti Masud Pezeşkianyň Gahryman Arkadagymyza pars diline terjime edilen «Enä tagzym — mukaddeslige tagzym» atly kitabyny gowşurmagynyň aýratyn mana eýe bolandygy buýsanç bilen bellenildi.
Mundan başga-da, maslahatyň dowamynda ýurdumyzyň meşhur sungat ussatlary, döredijilik toparlary tarapyndan mähriban enelerimizi, Watanymyzyň gülläp ösüşini wasp edýän aýdym-sazly çykyşlar ýerine ýetirildi.
Türkmen halkynyň Milli Lideri Gahryman Arkadagymyzyň «Enä tagzym — mukaddeslige tagzym» atly kitabynyň pars diline terjime edilmegi mynasybetli geçirilen dabaraly maslahatyň ahyrynda oňa gatnaşyjylar hormatly Prezidentimiziň adyna Ýüzlenme kabul etdiler.
Muhammetmyrat NARMEDOW,
Türkmenistanyň Daşary işler ministrliginiň
Halkara gatnaşyklary institutynyň talyby.
Çeşme: «Arkadag» gazeti - 05.09.2024 ý. //