OZON GATLAGYNY GORAMAGYŇ HALKARA GÜNI
Her ýylyň 16-njy sentýabry ozon gatlagyny goramagyň halkara günüdir. Häzirki wagtda ozon gatlagyny goramak meselesi dünýäde iň möhüm global meseleleriň biri hasaplanylýar. Dünýädäki iri döwletler we halkara guramalar bu global meseläniň möhümligini nygtap, bu ugurda birnäçe halkara taslamalary işläp düzýärler. Şol bir wagtda, käbir döwletler özleriniň ekologiki maksatnamalary bilen tebigy gatlagyň goralmagyna ýakyndan ýardam berýärler.
Günüň ýiti şöhlesinden we Günden gelýän, adam bedenine zyýanly ultramelewşe şöhleleriň täsirinden goranmak üçin ozon gatlagynyň tutýan orny uludyr. Ozon kislorod atomynyň üçli birleşmesinden emele gelýär. Tebigy halatlarda örän kyn ýagdaýda we az mukdarda döreýänligi sebäpli, gatlagy goramaklygyň zerurlygy adamzada gönümel baglydyr.
Soňky ýyllarda alymlaryň geçiren barlaglaryna laýyklykda, ozon gatlagynda emele gelen boşluklaryň tebigy görnüşde öz-özünden täzelenýänligi anyklanyldy. Munuň ýüze çykarylmagy, tebigatyň özüni täzelemek ukybynyň barlygyny görkezýär.
2009-njy ýylda «Ozon gatlagyny goramak hakynda» Türkmenistanyň Kanunynyň güýje girmegi, ýurdumyzyň bu meselä çynlakaý garaýandygynyň nyşanydyr.
Ýurdumyzyň daşky gurşawy goramakda alyp barýan döwlet syýasaty özüniň oňyn miwesini berýär. Arkadag şäheriniň ekologiki taýdan arassa şäherleriň arasynda öňdebaryjy orunda durmagy, ýurdumyzy bagy-bossanlyga öwürmek boýunça kabul edilen maksatnamalar we durmuşa geçirilýän işler Gahryman Arkadagymyzyň, hormatly Prezidentimiziň parasatly we öňdengörüjilikli syýasatlarynyň aýdyň kepilidir.
Sähetmyrat BABAÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň 2-nji ýyl talyby.