«Mert çykar myhmana güler ýüz bile»
Akyldar şahyrymyz Magtymguly Pyragynyň bu setirinde türkmen halkynyň myhmansöýerliginiň waspyny görmek bolýar. Täze taryhy döwrümizde bu ýörelgämiz halkara derejede hem belent ykrar tapýar. Şunuň bilen baglylykda, BMG-niň Awaza maslahaty hem diňe bir duşuşyklardyr çözgütler bilen däl, eýsem, türkmen myhmansöýerligi, gije-gündiz myhmanlara hyzmat edýän hünärmenleriň zähmeti bilen hem taryhy waka öwrüldi. Gahryman Arkadagymyzyň hem-de hormatly Prezidentimiziň tagallalary bilen bu iri foruma taýýarlygyň çäklerinde myhmanlary türkmen myhmansöýerligi bilen garşylamak, olara ýokary derejede hyzmat etmek üçin ähli zerur işler geçirildi. Biz hem myhmanlara hyzmat etmekde ýokary işjeňlik görkezen wekilleriň käbirleriniň ýürek buýsançlaryny okyjylarymyza ýetirýäris.
Kakageldi AKMYRADOW,
Türkmenistanyň Daşary işler ministrliginiň Halkara gatnaşyklary institutynyň talyby,
meýletinçi:
— BMG-niň ýokary wekilçilikli bu maslahaty bilim-tejribämizi kämilleşdirmek üçin uly mümkinçilik boldy. Elbetde, daşary ýurtlular bilen işleşmek diplomatiýanyň iň inçe usullaryny, dialog medeniýetini talap edýär. Şunuň bilen baglylykda, bu foruma taýýarlygyň çäklerinde bize dil taýýarlygy, protokol kadalary boýunça ýerine ýetirilmeli işleriň maksatnamasy esasynda ýörite okuwlaryň geçirilendigini bellemek gerek. Biz forumyň bütin dowamynda myhmanlaryň ýanynda bolup, terjimeçilik etdik, ýolbelet bolduk. Myhmanlar ýurdumyz, paýtagtymyz hakda örän köp gyzyklandylar. Şunda Afrika materiginde ýerleşýän Sudan Respublikasyndan gelen myhmanlaryň biriniň gadymy Parfiýa medeniýeti hakynda köp maglumat bilmegi bizi haýran galdyrdy. Umuman, taryhy ýadygärliklerimiz, milli gymmatlyklarymyz, milli tagamlarymyz myhmanlaryň hiç birini hem biparh goýmady. Biz — ýaşlara bilim-tejribämizi kämilleşdirmek babatda giň mümkinçilikleri döredip berýän Gahryman Arkadagymyzyň hem-de hormatly Prezidentimiziň beýik işleri elmydama rowaçlyklara beslensin!
«Nesil».