HALK MASLAHATY — HALKYŇ GALKYNAN YKBALY
Mälim bolşy ýaly, şu ýylyň 19-njy sentýabrynda Garaşsyz, hemişelik Bitarap döwletimiziň mukaddes Garaşsyzlygynyň 34 ýyllyk baýramynyň öň ýanynda türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň baştutanlygynda, hormatly Prezidentimiziň gatnaşmagynda Türkmenistanyň Halk Maslahatynyň mejlisi geçirildi. Onda halkymyzyň bagtyýar, abadan durmuşyny üpjün etmäge gönükdirilen döwlet we syýasy-jemgyýetçilik durmuşynyň möhüm meseleleri, uzakmöhletleýin geljek üçin ýurdumyzy ösdürmegiň wezipeleri ara alnyp maslahatlaşyldy.
Ýokary derejede geçirilen bu umumymilli forum taryhy ähmiýete eýe bolan çözgütleri özünde jemledi. Kabul edilen şol çözgütlere Garaşsyz, hemişelik Bitarap Watanymyzyň döwlet berkararlygynyň binýady hökmünde baha berip bolar.
Halkara parahatçylyk we ynanyşmak ýylynyň möhüm wakasyna öwrülen Türkmenistanyň Halk Maslahatynyň mejlisiniň ýokary derejede geçirilmegi we onuň taryhy ähmiýetli şanly wakalara beslenmegi ýurdumyzda ählumumy maslahatlaryň ýokary guramaçylyk derejesiniň üpjün edilýändiginiň nobatdaky beýanyna öwrüldi.
Gahryman Arkadagymyzyň we Arkadagly Gahryman Serdarymyzyň mejlisde eden çuň many-mazmunly taryhy çykyşlary möhüm ähmiýeti bilen, hemişe bolşy ýaly, üns merkezinde boldy. Şol çykyşlarda halkymyzyň ýaşaýyş-durmuş şertlerini mundan beýläk-de ýokarlandyrmak, döwlet we jemgyýetçilik işlerini kämilleşdirmek we ýurdumyzyň sazlaşykly ösüşini pugtalandyrmak häzirki döwrüň möhüm wezipeleriniň hatarynda kesgitlenildi.
Şunda halkymyzyň bähbidine gönükdirilen il-ýurt bähbitli meseleleriň we kabul edilen döwletli çözgütleriň ýurdumyzyň ösüşlerine saldamly goşant goşýan zähmetsöýer halkymyzy täze zähmet üstünliklerine ruhlandyrdy. Döwletimiziň içeri we daşary syýasaty, milli ykdysadyýetimiziň ähli ugurlarynda gazanylan üstünlikler, hususy pudagy has-da kämilleşdirmek, halkymyzyň ýaşaýyş-durmuş derejesi, ylym, bilim, sport, medeniýet babatda, saglygy goraýşy ösdürmek, ýaş nesilleri döwrebap terbiýelemek häzirki döwrüň möhüm wezipeleri hökmünde ykrar edildi.
“Täze taryhy döwürde öňde goýlan wezipeleriň ählisi-de geljekde halkymyzyň abadan, bolelin durmuşyny üpjün etmekden ybaratdyr. Garaşsyz, hemişelik Bitarap Türkmenistan gülläp ösýän, adamzada ýagşylyk nuruny saçýan beýik döwletdir. Garaşsyzlygymyzyň we hemişelik Bitaraplygymyzyň maksatlary beýikdir, bu beýik maksatlary amala aşyrýan halkymyz hem beýikdir” diýip, Gahryman Arkadagymyzyň taryhy mejlisde eden çykyşy maslahata gatnaşyjylar tarapyndan uly goldaw we ruhubelentlik bilen kabul edildi.
Türkmenistanyň Halk Maslahatynyň mejlisinde döwlet Baştutanymyzyň çykyşynda täze kanunçylyk namalaryny kabul etmek we yzygiderli kämilleşdirmek, halkymyzyň ýaşaýyş-durmuş derejesini mundan beýläk-de ýokarlandyrmak maksady bilen, halkymyzdan gelip gowuşýan teklipleri öwrenmek we seljermek bilen, giň möçberli işleriň hukuk esaslaryny has-da pugtalandyrmagy häzirki döwrüň talaby hökmünde öňe sürdi. Bu bolsa hormatly Prezidentimiziň baştutanlygynda raýatlaryň kanuny bähbitlerini goramagyň türkmen jemgyýetinde ileri tutulýandygyny, bu ýörelgeleriniň Berkarar döwletiň täze eýýamynyň Galkynyşy döwrüniň syýasatynyň özenini düzýändigini görkezýär.
Taryhy Maslahatda döwlet Baştutanymyzyň ýurdumyzyň hemişelik Bitaraplyk syýasatynyň döwletimiziň milli kanunçylygyndaky ornuny has-da berkitmek maksady bilen, «Bitarap Türkmenistanyň parahatçylyk we ynanyşmak syýasatynyň hukuk esaslary hakynda» Türkmenistanyň Konstitusion kanunyna gol çekdi. Munuň özi Türkmenistanyň tejribesiniň beýleki döwletler üçin nusgalykdygyny, ýurdumyzyň bitaraplyk ýörelgeleriniň we öňüni alyş diplomatiýasynyň parahatçylygy hem-de durnuklylygy üpjün etmek üçin netijeli gural bolup durýandygyny görkezýär.
Bu Konstitusion kanun türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň başlangyjy bilen işlenilip taýýarlanylan we Arkadagly Gahryman Serdarymyz tarapyndan üstünlikli durmuşa geçirilýän Bitarap Türkmenistanyň netijeli syýasy strategiýasynyň aýdyň nusgasy bolup, ýurdumyzyň halkara giňişliginde bitaraplyk, ynsanperwerlik we netijeli dialoga esaslanýan daşary syýasatynyň esasy ýörelgelerini berkidýär.
Türkmeistanyň Halk Maslahatynda birnäçe möhüm resminamalara gol çekilendigini bellemek gerek. Şolaryň hatarynda hormatly ýaşulularymyzy we mähriban enelerimizi sylaglamak hakynda, zähmetde gazanan üstünlikleri bilen tapawutlanan ýurdumyzyň raýatlaryny Garaşsyzlyk baýramy mynasybetli döwlet sylaglary bilen sylaglamak hakynda Permanlar, şeýle hem Ahal, Daşoguz, Lebap we Mary welaýatlarynyň käbir etraplarynyň häkimliklerini döretmek hem-de Balkan welaýatynyň Türkmenbaşy etrabynda karbamid öndürýän toplumy gurmak hakynda Kararlar bar.
Bu resminamalar berkarar Watanymyzda halal zähmet çekýän raýatlarymyza döwlet tarapyndan uly hormat-sarpa bildirilýändigini görkezip, alnyp barylýan işleriň hem-de amala aşyrylýan özgertmeleriň Garaşsyz ýurdumyzy durmuşykdysady taýdan ösdürmäge, ilatymyzyň halýagdaýyny hasda gowulandyrmaga ýardam etmäge gönükdirilendir.
Şanly Garaşsyzlygymyzyň 34 ýyllyk toýunyň öňisyrasynda geçirilen halk häkimiýetiniň ýokary wekilçilikli edarasy bolan Türkmenistanyň Halk Maslahatynyň nobatdaky taryhy mejlisinde Gahryman Arkadagymyz: “Ynsan üçin Watandan beýik mukaddeslik, Watandan beýik gymmatlyk ýokdur. Bagtly bolmak üçin Watany söýmek gerek. Çünki Watany söýmek — bu Watanyň asudalygy, gülläp ösüşi üçin zähmet çekmekdir, yhlas etmekdir. Sebäbi kim Watanyny depesine täç eýlese, Watany hem ony başyna täç eýlär” diýip belledi.
Gahryman Arkadagymyzyň şeýle sargytlary häzirki zaman türkmen jemgyýetini ruhy taýdan galkyndyrmaga, ýaşlarda milli buýsanç duýgusynyň kemala gelmegine, halkymyzyň döredijilik ýörelgesini, oňyn özgertmelere bolan ynamyny hem-de Watanymyzyň ykbalyna jogapkärçiligini has-da ýokarlandyrmaga ýardam edýär.
Selbi NAZAROWA,
Türkmenistanyň Daşary işler ministrliginiň
Halkara gatnaşyklary institutynyň mugallymy