GERMANIÝA FEDERATIW RESPUBLIKASYNYŇ TÜRKMENISTANDAKY ILÇISINIŇ GATNAŞMAGYNDA GEÇIRILEN DUŞUŞYK
2024-nji ýylyň 25-nji noýabrynda Türkmenistanyň Daşary işler ministrliginiň Halkara gatnaşyklary institutynda Germaniýa Federatiw Respublikasynyň Türkmenistandaky Ilçisiniň gatnaşmagynda türkmen talyplary bilen duşuşyk geçirildi. Duşuşyga Germaniýa Federatiw Respublikasynyň Türkmenistandaky Ilçisi Bern Haýs, şeýle-de Türkmenistanyň Daşary işler ministrliginiň Halkara gatnaşyklary institutynyň, Magtymguly adyndaky Türkmen döwlet uniwersitetiniň, Döwletmämmet Azady adyndaky Türkmen milli dünýä dilleri institutynyň talyplary gatnaşdylar.
Duşuşygyň dowamynda hormatly Ilçi Türkmenistan bilen Germaniýa Federatiw Respublikasynyň arasyndaky syýasy-diplomatik, söwda-ykdysady, medeni-ynsanperwer ugurlar boýunça ýetilen sepgitler we durmuşa geçirilen işler barada gürrüň berdi.
Mälim bolşy ýaly, Germaniýa Federatiw Respublikasy Türkmenistanyň esasy hyzmatdaşlarynyň biridir. Şeýle duşuşyklaryň yzygiderli geçirilmegi, geljekki halkaraçy hünärmenlere ýurdumyzyň hyzmatdaş döwletini içgin öwrenmäge giň mümkinçilikleri döredýär.
Täsirli geçen duşuşygyň ahyrynda institutyň talyplary hormatly Ilçä özlerini gyzyklandyrýan sowallary berdiler.
Şasenem MEÝLISOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.