Daşary syýasatymyzda Ykdysady diplomatiýanyň orny
Hormatly Prezidentimiziň baştutanlygynda ýurdumyzyň daşary syýasatynyň binýatlyk esaslary ata Watanymyzda amala aşyrýan möhüm syýasy ugurlarynda öz beýanyny tapýar. Bu syýasy ugurlara laýyklykda, Türkmenistan hemişelik Bitaraplyk ýörelgelerine, şeýle hem beýleki döwletleriň işine gatyşmazlyga, gapma-garşylyklary parahatçylykly ýol bilen we syýasy serişdeler arkaly çözmäge ygrarly bolup durýar. Watanymyz durnukly ösüşi üpjün etmek babatdaky ýörelgä eýermek bilen, bu ugurda geçirilýän syýasy-diplomatik we ykdysady çäreleri has işjeňleşdirýär.Türkmenistan dünýäniň ençeme döwletleri bilen syýasy, ykdysady we medeni taýdan deňhukukly hyzmatdaşlygy yzygiderli pugtalandyrýar.
Häzirki döwürde dünýä ösüşiniň täze meýillerini, şeýle hem milli ykdysadyýetiň durmuş-ykdysady şertlerini seljermek esasynda Türkmenistanyň ykdysady diplomatiýasynyň strategik ugurlary kesgitlenildi. Häzirki zaman globallaşma şertlerinde Türkmenistanyň ykdysady diplomatiýasy toplumlaýyn we ulgamlaýyn häsiýete eýe bolup, döwletiň wajyp wezipeleriniň birini ýerine ýetirýär. Türkmenistanyň daşary syýasaty içerki syýasat bilen berk baglanyşykly bolup, döwletiň durmuş - ykdysady meselelerini çözmekde ykdysady diplomatiýanyň wajyp ornuny tassyklaýar. Ykdysady diplomatiýa, halkara gatnaşyklarynda tebigy hadysadyr, döwletiň daşary syýasatynyň we halkara işiniň aýrylmaz bölegidir, şeýle hem daşary syýasaty durmuşa geçirmek üçin ulanylýan görnüşleri we usullary bolan ykdysady diplomatiýanyň maksatlaryny we wezipelerini kesgitleýän daşary syýasatdyr. Häzirki zaman ykdysady diplomatiýasy, döwlet üçin iň uly peýdalar we iň az çykdajylar bilen, daşary ykdysady syýasaty durmuşa geçirmek arkaly döwletiň we işewürligiň üznüksiz, köptaraplaýyn işidir.
Şeýle maksatlardan ugur alyp hem Türkmenistanyň Daşary işler ministrliginiň Halkara gatnaşyklary inistitutynda Türkmenistanyň diplomatiýasynyň möhüm ugurlary boýunça okuw merkezinde 2022-nji ýylda “Ykdysady diplomatiýa” ugry boýunça talyplara fakultatiw okuw sapaklary gurnaldy. Okuw sapaklaryny üstünlikli tamamlan talyplara Şahadatnamalar gowşurylýar. Bu bolsa geljekde ýurdumyzyň ykdysady kuwwatyny has hem ýokarlandyrjak ýaşlaryň kemala gelmegini üpjün edýär.
Goý, ýurdumyzyň ykdysady diplomatiýasynyň kuwwatyny has-da ýokarlandyrmak babatda beýik işleri üstünlikli amala aşyrýan türkmen halkynyň Milli Lideri Gahryman Arkadagymyzyň, Arkadagly Serdarymyzyň janlary sag, belent başlary aman bolsun!
Gyzylgül GURBANMUHAMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
kafedrasynyň mugallymy.