BÜTINDÜNÝÄ ŞÄHERLER GÜNI
“Bütindünýä şäherler güni” her ýylyň 31-nji oktýabrynda bellenip geçilýär. Bu sene ilkinji gezek 2013-nji ýylyň 27-nji dekabrynda Birleşen Milletler Guramasynyň Baş Assambleýasynyň A/RES/68/239 belgili rezolýusiýasynda kabul edilip, 2014-nji ýylyň 31-nji oktýabrynda bu güni bellemek kararlaşdyryldy.
Her ýyl bu sene aýratyn şygar esasynda geçirilip, onuň maksady dünýä jemgyýetçiliginiň global şäherleşme baradaky gyzyklanmasyny giňeltmekden ybarat bolup, bu hereket “Has gowy şäher, has gowy durmuş” şygary astynda geçirilýär.
2014-nji ýyldan bäri “Bütindünýä şäherler güni” mynasybetli her ýyl halkara maslahatlar geçirilýär. Şol ýyl ilkinji gezek “Öňdebaryjy şäher özgertmeleri” ady bilen Hytaý Halk Respublikasynyň Şanhaý şäherinde geçirildi.
Soňra bu maslahat 2015-nji ýylda Italiýanyň Milan şäherinde, 2016-njy ýylda Ekuadoryň Kito şäherinde, 2017-nji ýylda Hytaý Halk Respublikasynyň Guançžou şäherinde, 2018-nji ýylda Beýik Britaniýanyň Liwerpul şäherinde, 2019-njy ýylda Russiýa Federasiýasynyň Ýekaterinburg şäherinde, 2020-nji ýylda Keniýanyň Nakuru şäherinde, 2021-nji ýylda Müsür Arap Respublikasynda, 2022-nji ýylda bolsa ýene Hytaý Halk Respublikasynyň Şanhaý şäherinde geçirilipdi.
Bu ýyl bolsa "Halkara şäherler güni" baradaky maslahat Türkiýe Respublikasynyň Üsküdar şäherinde geçirildi.
Ogulşat GELDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň IV ýyl talyby.