Bütindünýä saglyk güni mynasybetli sport çärelerine badalga berildi
Sporty giňden ösdürmek, türkmen jemgyýetinde zyýanly endikleriň öňüni almakda wajyp orun eýeleýän sagdyn durmuş ýörelgesini işjeň wagyz etmek hem-de ony döwlet syýasatynyň ileri tutulýan ugurlarynyň birine öwürmek häzirki wagtda Türkmenistan ýurdumyzda giňden ýaýbaňlandyrylýar. Berkarar döwletiň täze eýýamynyň Galkynyşy döwründe ýurdumyzda sporta aýratyn üns berilýär. Muny türkmen türgenleriniň dürli derejedäki halkara ýaryşlaryndaky gazanýan üstünlikleri hem tassyklaýar. Bularyň hemmesi dünýäde Türkmenistanyň sport ulgamyndaky abraýyny has hem ýokarlandyrýar we berkidýär.
“Arkadag Serdarly – bagtyýar ýaşlar” ýylymyzda türkmen ýaşlarynyň kämil bilim almaklary hem-de sagdyn ruhly, berk bedenli bolmaklary üçin aladalar edilýär. Bilim ojaklarynda bilim alýan talyplaryň sport bilen şeýle hem köpçülikleýin bedenterbiýe bilen meşgullanmaklary üçin ähli şertler döredilýär.
Bütindünýä saglyk güni mynasybetli köpçülikleýin bedenterbiýe we sport çäreleri Türkmenistanyň Daşary işler ministrliginiň Halkara gatnaşyklary institutynda aprel aýynyň ilkinji günlerinden guralyp başlandy. Bu köpçülikleýin bedenterbiýe we sport çäreleriniň başy aýdym-sazly dabara bilen başlandy. Bu dabarada institutyň aýdym-saz hem-de tans toparlary ajaýyp çykyşlary bilen sport çäresine gatnaşyjylary şeýle hem talyp türgenleri joşdurdylar. Çäräniň dowamynda köpçülikleýin gimnastiki maşklar we sportuň görnüşleri boýunça görkezme çykyşlar ýerine ýetirildi. Soňra bolsa welosiped sportuny söýüji talyplaryň gatnaşmaklarynda köpçülikleýin welosipedli ýörişi guraldy. Institutymyzda ýerleşýän ýaş diplomatlaryň küşt merkezinde bolsa, talyp oglanlar we gyzlar öz aralarynda küşt we şaşka boýunça ýaryşdylar. Sport toplumynda talyp oglanlaryň arasynda geçirilen sportuň gandbol hem-de basketbol görnüşi boýunça fakultetara ýaryşlar bolsa, diýseň çekeleşikli we gyzykly boldy. Şeýle sport çäreleri aprel aýynyň dowamynda yzygiderli dowam eder.
Oguljahan JOBBOROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň II ýyl talyby.
https://turkmenistaninfo.gov.tm/news/355