Arzyly arzuwlaryň wysaly
Talyplyk — ömrüň altyn çagy, ýaşlygyň bahary. Talyp döwürleriň, uçurym bolan ýokary okuw mekdebiň ömrüň bir hoşasy bolup hakyda siňýär. «Talyp» adyna mynasyp bolmak üçin irginsiz okamagyň, kämilleşmegiň, öz üstüňde köpräk işlemegiň zerurdygy bolsa düşnükli zat. «Bilimi zor talyp bolar» diýlişi ýaly, ine, täze okuw ýylynda-da zehinli ýaşlaryň müňlerçesi talyp şahadatnamasyny ele alyp, tolgundyryjy pursatlary başdan geçirýärler. Biz hem arzuwlary hasyl bolan ýaşlaryň ýürek buýsançlaryny okyjylarymyza ýetirmegi makul bildik. Elbetde, bagtdan paýly ynsanlaryň şatlygyna goşulmak hem bagtyň bir bölegi ahbetin.
— Durmuşda kähalatlar ykbalyň seni garaşylmadyk menzillere, ýollara atarýanyny duýman galýan ekeniň. 2021-nji ýylyň güýz aýlarynda «Nesil» gazetinde çap edilen «Parahatçylygyň ýaş çaparlary» atly akyl-paýhas bäsleşiginiň bildirişine gabat gelmegim ykbalymy düýpgöter özgertdi. 2022-nji ýylda bäsleşigiň birinji möwsüminiň ýeňijisi bolmak bagtyna, şondan bir ýyl soň bolsa ikinji möwsümde Baş baýraga hem-de göçme kuboga mynasyp boldum. 2019-njy ýylda Türkmenistanyň mekdep okuwçylarynyň arasynda geçirilýän «Altyn asyryň altyn zehinleri» ders bäsleşiginiň Tejen şäher tapgyrynda taryh dersi boýunça ikinji orny eýeledim. Şeýle-de 2022-nji ýylda Türkmenistanyň Daşary işler ministrliginiň garamagyndaky Ýaş diplomatlar mekdebiniň guramagynda geçirilen düzme bäsleşiginde hem birinji orny eýelemek bagty miýesser etdi. Ynsan ömri pursatlardan düzülýär. Türkmen diplomatiýasynyň milli mekdebiniň talyby bolmagym ykbalymy täze menzillere, uly başlangyçlara atardy.
Yhlas HALLYÝEW,
Türkmenistanyň Daşary işler ministrliginiň
Halkara gatnaşyklary institutynyň
halkara žurnalistikasy hünäriniň 1-nji ýyl talyby
“Nesil” gazeti 02.09.2023