Arkadag şäheri — iri sport merkezi
Ähli babatda nusgalyk derejä eýe bolan Arkadag şäherinde futbol bilen meşgullanmak üçin ajaýyp mümkinçilikler döredildi. Şu maksatlar bilen, Arkadag şäheriniň Bedenterbiýe we sport baradaky baş müdirligi döredip, köpugurly sport toplumy we sport merkezi (suw-sport toplumy), 10 müň orunlyk stadion guruldy. Olaryň ählisi halkara ölçeglere laýyk gelýän enjamlar bilen üpjün edildi. Bu ýerde sportuň başa-baş söweş görnüşleri, futbol, woleýbol, basketbol, uly we stol üstündäki tennis, agyr we ýeňil atletika, gimnastika, gylyçlaşmak, küşt, şaşka we beýlekiler, şol sanda sportuň suw görnüşleri bilen meşgullanmak üçin ähli şertler döredildi. Şeýle hem fitnes, trenažýor, maslahatlar zallary we beýleki otaglar göz öňünde tutuldy. Sport merkezinde suwda ýüzülýän uly howuzdan başga-da, çagalar üçin niýetlenen suw-attraksionly howuz bar.
Ýatlap geçsek, Arkadag şäheriniň açylyş dabarasynda şäher stadionynyň öňündäki meýdançada türkmen türgenlerini, şol sanda halkara ýaryşlarda baýrakly orunlara mynasyp bolan ýaşlaryň, Türkmen döwlet bedenterbiýe we sport institutynyň talyplarynyň, ugurdaş okuw mekdepleriniň okuwçylarynyň görkezme çykyşlary ýaýbaňlandyryldy. Olar sportuň dürli görnüşleri boýunça öz ussatlyklaryny görkezdiler. Talyplaryň «Sagdyn nesil» atly tans topary hem özüniň döredijilik sowgadyny taýýarlady. Şol pursatda sport merkezinde suwda ýüzüjiler we suwda top oýnaýanlar öz başarnyklaryny görkezdiler. Köpugurly sport toplumynyň zallarynda hem türgenleriň çykyşlary guraldy.
Aýratyn bellemeli ýagdaý, 1-nji iýunda bu stadionda ilkinji futbol duşuşygy geçirildi. «Arkadag» hem-de «Ahal» futbol toparlary özara ýaryşdylar. Netijede, «Arkadag» topary 3:0 hasabynda ýeňiş gazandy. Şeýlelikde, futbol jemgyýetiniň wekilleri täze stadionyň mümkinçiliklerini hem synagdan geçirdiler. 10 müň orunlyk bu stadionda geljekde ýurt we halkara derejeli futbol duşuşyklarynyň köp sanlysyny geçirmek meýilleşdirilýär.
Begendik DÖWLETÝAROW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň 2-nji ýyl talyby.