Zehinli ýaşlary ýüze çykarmak döwrüň möhüm talabydyr
2024-nji ýylyň 20-nji maýynda Türkmenistanyň Inženertehniki we ulag kommunikasiýalary institutynda «Zehinli ýaşlary ýüze çykarmak döwrüň möhüm talabydyr» atly ylmy-usuly maslahat geçirildi. Bu maslahata Türkmenistanyň Bilim ministrliginiň wekilleri, ýurdumyzyň ýokary okuw mekdepleriniň professor-mugallymlarydyr talyp ýaşlary, şol sanda Türkmenistanyň Daşary işler ministrliginiň Halkara gatnaşyklary institutynyň talyplary hem gatnaşdylar.
Mälim bolşy ýaly, ýaşlaryň ylym babatdaky başarnyklaryny doly ýüze çykarmak, bilimli, ylymly nesli kemala getirmek maksady bilen ýurdumyzyň ýokary okuw mekdeplerinde döwrebap şertler döredilýär. Ylma teşne talyplar mümkinçiliklerden netijeli peýdalanyp, döwlet we halkara derejesinde geçirilýän olimpiadalarda, bäsleşiklerde öz zehinlerini, ukyp-başarnyklaryny, bilim derejelerini görkezip, ýokary netijeleri gazanýarlar. Türkmen ýaşlarynyň gazanan üstünlikleri ylmy-usuly maslahatyň çäklerinde guralan sergide aýdyň şöhlelendirildi.
Ylmy-usuly maslahatyň esasy maksady ýurdumyzyň bilim ulgamynyň hil taýdan täze derejä çykarylmagyny mundan beýlägem ösdürmekden, ýaşlaryň bilimler we ylymlar dünýäsine çuňňur aralaşmagy, talyplaryň halkara bäsleşiklere, internet olimpiadalaryna işjeň gatnaşyp, ýokary derejedäki medallara mynasyp bolmaklaryny gazanmakdan ybaratdyr. Maslahatda çykyş edenler ýurdumyzyň ýaşlar boýunça halkara hyzmatdaşlygy barada giňişleýin belläp geçdiler.
Ylmy-usuly maslahatyň dowamynda aýdym-sazly çykyşlara hem giň orun berildi. Çykyş edenler maslahatyň ahyrynda ýurdumyzda hemmetaraplaýyn ösen, kämil nesli ýetişdirmek ugrunda taýsyz tagallalary we mümkinçilikleri döredýän Gahryman Arkadagymyza, Arkadagly Gahryman Serdarymyza çäksiz sagbolsunlaryny aýtdylar.
Selbi GULMYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.