Yzygiderli geçirilýän okuw maslahatynyň nobatdaky sany
2021-nji ýylyň 26-njy maýynda Türkmenistanyň Daşary işler ministrliginiň Halkara gatnaşyklary institutynyň talyplarynyň gatnaşmagynda Türkmenistanyň Bilim ministrliginiň, Türkmenistanyň Gyzyl Ýarymaý Milli jemgyýetiniň, Türkmenistanyň Sport we ýaşlar syýasaty ministrliginiň bilelikde “Türkmenistanda ýaşlar baradaky döwlet syýasatynyň 2021-2025-nji ýyllar üçin Döwlet maksatnamasyny” üstünlikli amala aşyrmak maksady bilen sanly ulgam arkaly yzygiderli alnyp barylýan okuw maslahatynyň nobatdaky sany geçirildi.
Bu okuw maslahatyny Myrat Garryýew adyndaky Türkmenistanyň Döwlet lukmançylyk uniwersitetiniň şeýle hem türkmen döwlet bedenterbiýe we sport institutynyň wekili alyp bardy. Olar sagdyn durmuş we fiziki işjeňlik ýörelgeleri hem-de keselleriň ýaýramagynyň öňüni almakda wagyz-ündew etmegiň ähmiýeti barada durup geçdiler. Şeýle hem ýaşlary Watana bolan söýgi ruhunda terbiýelemegiň, Berkarar döwletimiziň bagtyýarlyk döwrüniň ägirt uly özgertmeleriniň many-mazmunyny olaryň aňyna ýetirmegiň ösen jemgyýeti kemala getirmekdäki orny barada täsirli çykyş etdiler. Maslahatyň dowamynda mugallymlaryň çykyşlary talyp ýaşlaryň gyzykly sowal-jogap alyşmalary bilen utgaşdy.
Dünýägözel ÇARYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara
žurnalistikasy fakultetiniň II ýyl talyby.