ÝYLYŇ ŞYGARYNA BAGYŞLANAN OKUW SAPAGY
2026-njy ýylyň 9-njy fewralynda Türkmenistanyň Daşary işler ministrliginiň Halkara gatnaşyklary institutynda 2025-2026-njy okuw ýylynyň ikinji ýarymýyllygynyň ilkinji okuw sapagy geçirildi. Ol «Garaşsyz, baky Bitarap Türkmenistan — bedew batly at-myradyň mekany» ady bilen guraldy. Ony Žurnalistikanyň nazaryýeti we amalyýeti kafedrasynyň halypa mugallymy Jumaberdi Artykow alyp bardy.
Ilkinji umumy okuw sapagynda halypa mugallym talyp ýaşlara hemişelik Bitarap Türkmenistanyň Garaşsyzlygynyň şanly 35 ýylynyň dowamynda ylym-bilim we beýleki ulgamlarda ýeten ajaýyp sepgitleri barada giňişleýin gürrüň berdi. Şol sanda, ýurdumyzda žurnalistikanyň taryhy, onda häzirki wagta çenli gazanylan üstünlikler dogrusynda durup geçdi.
Ilkinji okuw sapagy Arkadagly Gahryman Serdarymyzyň «Türkmenistanyň Bitaraplygy — parahatçylygyň we ynanyşmagyň aýdyň ýoly» atly kitabyndan milli buýsanjymyzy artdyrýan jümlelerdir türkmen bedewiniň waspyny ýetirýän ajaýyp goşgulary talyp ýaşlaryň labyzly okamagy bilen jemlenildi.
Ilkinji okuw sapagyna gatnaşan talyp ýaşlar özleriniň döredijilikli okamaklary üçin taýsyz tagallalary edýän Gahryman Arkadagymyza, Arkadagly Gahryman Serdarymyza hoşallyk sözlerini beýan etdiler.
Ogulnur GELDIMYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 1-nji ýyl talyby.