ÝYLYŇ GERÇEK ÝIGITLERI ÖZARA BÄSLEŞDILER
2024-nji ýylyň 3-nji maýynda Aşgabat şäherindäki «Türkmengaz» döwlet konserniniň Medeni-işewürlik merkezinde Ýeňiş güni mynasybetli Türkmenistanyň Magtymguly adyndaky Ýaşlar guramasynyň Merkezi geňeşi bilen Bilim ministrliginiň bilelikde guramagynda ýokary okuw mekdepleriň talyp ýigitleriniň arasynda geçirilýän «Berkarar döwletiň täze eýýamynyň bagtyýar gerçekleri» atly döredijilik bäsleşiginiň jemleýji tapgyry geçirildi. Döredijilik bäsleşiginiň düzgünnamasyna laýyklykda, oňa gatnaşýan talyp ýigitler bäsleşigiň birinji şertine laýyklykda, öz saýlap alan hünärleriniň jemgyýetdäki ornuny çeper okaýyş bilen wasp etdiler. Ikinji şertde talyp ýigitler özleriniň sungata we döredijilige bolan ukybyny görkezip, türkmen ýigidine mahsus bolan ruhubelentlik, edermenlik, mertlik, adalatlylyk häsiýetlerini açyp görkezdiler.
Döredijilik bäsleşiginiň üçünji şerti has-da täsirli boldy. Onda talyp ýigitler şorta sözleri aýdyp, degişme sahnalaryny ýerine ýetirdiler. Türkmenistanyň Magtymguly adyndaky Ýaşlar guramasynyň Merkezi Geňeşiniň we Türkmenistanyň Bilim ministrliginiň guramagynda ýokary okuw mekdepleriniň talyp ýigitleriniň arasynda bu bäsleşigiň ýylyň-ýylyna geçirilmegi hem hut şu maksatlardan gözbaş alýar. Baýramçylyk ruhuna beslenen sahnada ýigitler bäsleşigiň şertleri boýunça saýlan hünärleriniň jemgyýetdäki ornuny çeper döredijiligiň üsti bilen wasp etdiler. Bäsleşigiň soňky şertine görä, talyp ýigitler degişme sahnasyny görkezmek bilen, tomaşaçylarda ýatdan çykmajak täsir galdyrdylar. Uly ruhubelentlige beslenen bäsleşikde ýeňiş gazanan gerçek ýigitlere Türkmenistanyň Magtymguly adyndaky Ýaşlar guramasynyň Merkezi Geňeşiniň hem-de Türkmenistanyň Bilim ministrliginiň diplomlary we gymmat bahaly sowgatlary gowşuryldy. Şeýle hem, işjeň gatnaşan ähli talyplar Hormat hatlary we höweslendiriji baýraklar bilen sylaglanyldy.
Maksat MERDANOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby.