Ýylyň gerçek ýigitleri özara bäsleşdiler
2023-nji ýylyň 5-nji maýynda güneşli ülkämiziň ýokary okuw mekdeplerinde bilim alýan talyp ýigitleriň arasynda Türkmenistanyň Nebitgaz toplumynyň «Nebitgazhyzmat» ýapyk görnüşli paýdarlar jemgyýetiniň Medeni-işewürlik merkezinde bäsleşik geçirildi. Bu bäsleşikde talyp ýigitler öz aralarynda düzgünnama esasynda üç şert boýunça bäsleşdiler.
Ýurdumyzyň ýokary okuw mekdepleriniň talyp ýaşlarynyň arasynda geçirilýän bäsleşikler olaryň boş wagtlaryny netijeli peýdalanmagyna, ukyp-başarnyklaryny ýüze çykarmaga ýardam edýär. Milli medeniýetimize we sungatymyza bolan söýgini artdyrýar we olaryň gazanýan her bir üstünlikleri halkymyzda buýsanç duýgusyny döredýär. Türkmenistanyň Magtymguly adyndaky Ýaşlar guramasynyň Merkezi Geňeşiniň we Türkmenistanyň Bilim ministrliginiň guramagynda ýokary okuw mekdepleriniň talyp ýigitleriniň arasynda bu bäsleşigiň ýylyň-ýylyna geçirilmegi hem hut şu maksatlardan gözbaş alýar. Baýramçylyk ruhuna beslenen sahnada ýigitler bäsleşigiň şertleri boýunça saýlan hünärleriniň jemgyýetdäki ornuny çeper döredijiligiň üsti bilen wasp etdiler.
Bäsleşigiň soňky şertine görä, talyp ýigitler degişme sahnasyny görkezmek bilen, tomaşaçylarda ýatdan çykmajak täsir galdyrdylar. Uly ruhubelentlige beslenen bäsleşikde ýeňiş gazanan gerçek ýigitlere Türkmenistanyň Magtymguly adyndaky Ýaşlar guramasynyň Merkezi Geňeşiniň hem-de Türkmenistanyň Bilim ministrliginiň diplomlary we gymmat bahaly sowgatlary gowşuryldy. Şeýle hem, işjeň gatnaşan ähli talyplar Hormat hatlary we höweslendiriji baýraklar bilen sylaglanyldy.
Pena ANNAMUHAMMEDOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň II ýyl talyby.