Ykdysady hyzmatdaşlyk guramasyna bagyşlanan okuw sapagy
2021-nji ýylyň 10-njy iýunynda Türkmenistanyň Eýran Yslam Respublikasyndaky Adatdan daşary we Doly ygtyýarly ilçisi Ahmet Gurbanow Ykdysady hyzmatdaşlyk guramasy boýunça Türkmenistanyň Daşary işler ministrliginiň Halkara gatnaşyklary institutunyň talyplaryna wideoaragatnaşyk arkaly okuw sapagyny geçirdi. Bu okuw sapagy Türkmenistanyň daşary işler ministrligi tarapyndan gurnalýan toplumlaýyn onlaýn sapaklarynyň nobatdakysy bolup, institutyň talyplarynyň diplomatiýa bilen bagly bilim derejesini has hem kämilleşdirmek maksady bilen geçirilýär.
Okuw sapagynyň dowamynda hormatly ilçi Ykdysady hyzmatdaşlyk guramasy boýunça iki döwletiň arasyndaky söwda-ykdysady gatnaşyklara aýratyn üns berilýändigi şeýle-de nebitgaz, gazhimiýa we gaýtadan işleýän senagat pudaklaryndaky, ulag we beýleki ulgamlardaky hyzmatdaşlygyň geljekki ugurlary boýunça ösýändigi hakynda giňişleýin gürrüň berdi. Wideoaragatnaşyk ulgamy arkaly geçen okuw sapagyň barşynda Türkmenistan bilen Eýran Yslam Respublikasynyň döwletleriniň arasyndaky dostlukly gatnaşyklary barada talyp ýaşlara gürrüň berildi.
Okuw sapagyň ahyrynda talyplar hormatly ilçä iki dostlukly ýurduň arasyndaky bähbitli hyzmatdaşlygy ösdürmäge gönükdirilen sowallary berdiler we bu ugurda özara pikir alyşdylar.
Muhammet GELDIMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara
žurnalistikasy fakultetiniň II ýyl talyby.