Ykdysady diplomatiýa ugry boýunça okuw sapagy
2024-nji ýylyň 26-njy martynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň «Ykdysady diplomatiýa» ugry boýunça nobatdaky okuw sapagy guraldy. Oňa Türkmenistanyň Daşary işler ministrliginiň Halkara gatnaşyklary institutynyň talyplary gatnaşdylar. Okuw sapagy «Türkmenistanyň Bütindünýä Söwda Guramasyna goşulyşmak meýliniň ylmy taýdan esaslandyrylmagy» atly temadan geçirildi.
Sapagy Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary kafedrasynyň mugallymy Sülgün Nepesowa alyp bardy.
Sapakda Türkmenistanyň Bütindünýä Söwda Guramasyna girmek üçin görýän taýýarlyk işleri dogrusynda giňişleýin gürrüň berildi. Ýagny ýurdumyzyň bu derejä eýe bolmagy Türkmenistanyň milli ykdysadyýetiniň ýokary depginli ösüşine, daşary söwda ulgamyndaky ornunyň pugtalanmagyna, köptaraplaýyn hyzmatdaşlygyň amala aşyrylmagyna, daşary ýurt maýa goýumlaryny çekmäge we halkara söwda gatnaşyklaryny ösdürmäge ýardam berjekdigi bellenilip geçildi.
Duşuşygyň ahyrynda talyplar özlerini gyzyklandyrýan sowallary bilen mugallyma ýüzlenip, olara giňişleýin jogap aldylar.
Gyzylgül GURBANMUHAMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary kafedrasynyň mugallymy.