ÝHHG-niň Merkezi edarasynyň guramagynda žurnalistleriň hukuklary barada sebitleýin maslahat geçirildi
2024-nji ýylyň 26-28-nji iýuny aralygynda Gazagystanyň Almaty şäherinde Ýewropada Howpsuzlyk we Hyzmatdaşlyk Guramasynyň (OSCE) Merkezi edarasynyň guramagynda «Sözbaşynyň aňyrsynda: metbugat azatlygyny öňe sürmek üçin žurnalistleri goramak» atly sebitleýin çäre geçirildi. Sebitleýin çärä Merkezi Aziýa döwletleriniň žurnalistleri, adam hukuklary boýunça işjeň agzalary, halkara guramalarynyň we döwlet edaralarynyň wekilleri bilen bir hatarda türkmen wekiliýeti hem gatnaşdy. 26-njy iýunda çärä gatnaşyjylaryň tanyşlyk dabarasy gurnaldy. Onda her döwletden gelen wekiliýet öz ýurtlary we ol ýerdäki žurnalistikanyň ýagdaýy, žurnalistler barada döwlet tarapyndan döredilýän mümkinçilikler barada tanyşdyrdylar. 27-nji iýunda günüň birinji ýarymynda maslahat geçirildi. Onda žurnalistleriň howpsuzlygy we sebitde söz azatlygyny goramak bilen baglanyşykly meseleler ara alnyp maslahatlaşyldy. Şeýle-de ýörite seminar gurnaldy. Bu seminaryň maksady köpçülikleýin habar beriş serişdeleriniň hünärmenlerine kiberhüjümleriň edilmeginiň öňüni almak üçin töwekgelçiligi azaltmak strategiýalaryny we teswirnamalaryny işläp düzmäge kömek etmekden, maglumatlary, maglumatlaryň gizlinligini, enjamlary we aragatnaşyk kanallaryny sanly töwekgelçiliklerden goramakdan we onlaýn yzarlamalara garşy durmakdan ybarat boldy. Sanly nou-hau we çeşmeler bilen üpjün etmekden başga-da, seminarda gender, psihososial we fiziki howpsuzlyk ölçeglerine seredildi. Şeýle-de žurnalistleri goldamak we goramak boýunça öňdebaryjy tejribäni hem-de çäreleri ara alyp maslahatlaşyldy. Onda esasy temalaryň biri hasaplanylýan hökümet işleriniň aç-açanlygyny üpjün etmekde we demokratiýany berkitmekde žurnalistleriň orny hakynda gürrüň edildi.
Umuman, çäräni guraýjylar maslahatlaşmalaryň netijesiniň sebitdäki ýagdaýy gowulandyrmak üçin täze strategiýalary we teklipleri işläp düzmäge kömek etjekdigine ynam bildirdiler. Çäräniň Gazagystanyň köpçülikleýin habar beriş serişdeleriniň işgärleriniň gününiň bellenilmeginiň öňüsyrasynda geçirilmegi onuň täsirliligini artdyrdy.
Jemile PÜRJÄÝEWA,
Türkmenistanyň Daşary işler ministrliginiň
Halkara gatnaşyklary institutynyň
Žurnalistikanyň nazaryýeti we amalyýeti
kafedrasynyň uly mugallymy.