«ÝAŞLAR – WATANYŇ DAÝANJY» ATLY KITABYŇ TANYŞDYRYLYŞ DABARASY
2023-nji ýylyň 6-njy ýanwarynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Daşary işler ministrligi tarapyndan Arkadagly Gahryman Serdarymyzyň «Ýaşlar – Watanyň daýanjy» atly ilkinji kitabynyň tanyşdyrylyş dabarasy geçirildi. Oňa Türkmenistanyň Daşary işler ministrliginiň, Döwlet, hukuk we demokratiýa institutynyň we ýurdumyzyň jemgyýetçilik guramalarynyň wekilleri, institutymyzyň professor – mugallymlary we talyp ýaşlary gatnaşdylar. Dabara gatnaşyjylar institutyň baş binasynda ýaýbaňlandyrylan sergini synladylar.
Dabarada Türkmenistanyň Ministrler Kabinetiniň Başlygynyň Orunbasary, Daşary işler ministri Raşid Meredow, Türkmenistanyň Magtymguly adyndaky Ýaşlar guramasynyň Merkezi geňeşiniň başlygy Ýazpolat Keriýew, Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary kafedrasynyň uly mugallymy Perhat Çaryýew, Halkara hukugy we deňeşdirme hukuk öwreniş kafedrasynyň mugallymy Gülsenem Hommadowa, şeýle-de institutymyzyň Halkara gatnaşyklary fakultetiniň 5-nji ýyl talyby Serdar Rahymow, Halkara žurnalistikasy fakultetiniň 5-nji ýyl talyby Tawus Akjaýewa dagy çykyş etdiler.
Çykyş edenler ata-babalarymyzdan miras galan däp-dessurlarymyzyň esasynda mynasyp nesilleri terbiýeläp ýetişdirmekde hormatly Prezidentimiziň alyp barýan döwlet syýasatynyň çäklerinde ähli mümkinçilikleriň we şertleriň döredilýändigi, häzirki döwürde ýurdumyzyň geljegi bolan ýaşlara ählitaraplaýyn goldaw berilýändigi barada nygtap geçdiler.
Şeýle hem çykyşlaryň dowamynda institutymyzyň mugallymlary we talyp ýaşlary, Türkmenistanyň ýaşlarynyň «Arkadag Serdarly bagtyýar ýaşlar» ýylynda ýeten sepgitleriniň, gazanan üstünlikleriniň jemi jemlenen hormatly Prezidentimiziň «Ýaşlar – Watanyň daýanjy» atly ilkinji kitabynda gazanan üstünlikleriniň beýan edilmegi bilen baglanyşykly ýürek buýsançlaryny aýtdylar.
Çäräniň institutymyzyň çeper-höwesjeňler topary tarapyndan taýýarlanan aýdym-sazly çykyşlar bilen utgaşmagy bu ajaýyp güne has-da täsirli öwüşgin çaýdy.
Dabaranyň ahyrynda oňa gatnaşyjylaryň adyndan hormatly Prezidentimize Ýüzlenme kabul edildi.
Agakuwwat ALLABERDIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk öwreniş kafedrasynyň mugallymy
Bu barada şu ýerde hem okap bilersiňiz: