«Ýaş ykdysatçylar» ylmy gurnagyň agzalarynyň nobatdaky duşuşygy
2023-nji ýylyň 22-nji fewralynda Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary kafedrasynyň «Ýaş ykdysatçylar» ylmy gurnagynyň 6-njy duşuşygy geçirildi. Oňa gurnagyň agzalary gatnaşyp, özleriniň alyp barýan ylmy işleri barada gürrüň berdiler. Şeýle-de Halkara ykdysady gatnaşyklary kafedrasynyň dosenti, teh.y.k., halypa mugallym Öwezmyrat Bäşimowyň ýolbaşçylygynda fakultetiň talyplary Ataýewa Güljeren “Telekeçileri daşary ýurt bazarlaryna çykarmakda halkara marketingiň orny”, Täşliýewa Selbi “Ykdysadyýetiň ösüş taryhy we geljegi”, Nurberdiýew Abdyresul “Aşgabat şäherinde ýolagçylary gatnatmagy logistikanyň nukdaýnazaryndan gurnamak”, Şöhradow Muhammet “Telekeçileriň halkara bazarlaryna çykmagynda bankyň orny”, Halnazarow Yhlasbek “Telekeçilikde ýüze çykýan ýagdaýlar we olary seljermek” atly ylmy işleri bilen çykyş etdiler. Şeýle hem tejribe alyşmakda we işewürlik gatnaşyklarynyň inçe syrlaryny öwrenmekde bilelikdäki duşuşyklaryň, ylmy-amaly maslahatlaryň, sapaklaryň we beýleki çäreleriň geçirilmeginiň uly ähmiýetiniň bardygy bellenildi. Duşuşyga gatnaşyjylar ýaşlara öz höwes bildirýän ugurlary boýunça ylmy işlere çekmekde berýän çäksiz goldawlary üçin hormatly Prezidentimize alkyş sözlerini aýtdylar.
Resul GYLYJOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
fakultetiniň II ýyl talyby.