Ýaş talyplarymyzyň sport älemindäki nobatdaky üstünlikleri
Sport sagdynlygyň gözbaşy, jemgyýetiň sagdynlygyny üpjün edýän gymmatlykdyr. Her bir ynsanyň sagdyn pikirlenmegi, zähmet öndürijiliginiň netijeli bolmagy üçin akyl zähmeti bilen fiziki zähmetiň gezekleşdirilmegi zerur bolup durýar.
Hormatly Prezidentimiz, Arkadagly Gahryman Serdarymyz: «Bedenterbiýe we sport jemgyýetiň sazlaşykly ösüşini üpjün edýär, adam häsiýetini kemala getirmekde möhüm orny eýeleýär» diýip örän jaýdar belläp geçýär. Häzirki döwürde sport boýunça halkara hyzmatdaşlygynyň ilerledilmegi döwlet syýasatynyň ileri tutulýan ugurlarynyň biri bolup durýar. Berkarar döwletiň täze eýýamynyň Galkynyşy döwründe, Arkadag Serdarly bagtyýar ýaşlar ýylynda hem ýaş nesliň bedenterbiýe we sport bilen meşgullanyp, berk bedenli, kämil aň-düşünjeli bolup ýetişmekleri üçin giň mümkinçikler döredilýär. Şeýle mümkinçiliklerden peýdalanýan türkmen ýaşlary hem sportuň dürli ugurlary boýunça döwlet derejesinde hem-de halkara derjesinde geçirilýän bäsleşiklere gatnaşyp ýokary netijeler gazanýarlar.
2023-nji ýylyň 22-nji noýabrynda Karatedo boýunça Türkmenistanyň çempionatynda Kata ugry boýunça 18-29 ýaşly erkekleriň arasynda geçirilen ýaryşda Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary fakultetiniň 1-nji ýyl talyby Rasul Atajanow I orna, 19-29 ýaşly 60 kg agramly erkekleriň arasynda Karatedo ugry boýunça geçirilen ýaryşda Türkmenistanyň Daşary işler ministrliginiň Halkara gatnaşyklary institutynyň Halkara hukugy fakultetiniň 2-nji ýyl talyby Ýusup Garajaýew III orna we 19-29 ýaşly 84 kg agramly erkekleriň arasynda Karatedo ugry boýunça geçirilen ýaryşda Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary fakultetiniň 3-nji ýyl talyby Dawut Nazmyradow I orna mynasyp bolmagy başardylar.
Ýaş talyp deň-duşlarymyzy sport ulgamynda gazanan ynamly ýeňşleri bilen tüýs ýürekden gutlap, olara geljekde hem okuwlarynda, sport äleminde uly üstünlikleriň ýar bolmagyny tüýs ýürekden arzuw edýäris!
Biz ýaşlara okamaga, öwrenmäge, döretmäge, bedenterbiýe we sport bilen meşgullanmaga döredip berýän giň mümkinçilikleri üçin türkmen halkynyň Milli Lideri Gahryman Arkadagymyza, hormatly Prezidentimiz Arkadagly Gahryman Serdarymyza köp sag bolsun aýdýarys! Goý, Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak bolsun! Il-ýurt bähbitli, umumadamzat ähmiýetli alyp barýan işleri elmydama rowaçlyklara beslensin!
Mekan ANNAMEŇLIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň 1-nji ýyl talyby.