Ýaş şahyryň döredijilik üstünligi
Ýaňy-ýakynda, has takygy, 2023-nji ýylyň 13-nji maýynda Balkan welaýatynyň Magtymguly etrabyndaky «Magtymguly» muzeýinde akyldar şahyryň doglan gününiň 300 ýyllygy mynasybetli «Nesil» gazetiniň redaksiýasy we Türkmenistanyň Magtymguly adyndaky Ýaşlar guramasynyň Merkezi geňeşi tarapyndan ýurdumyzyň döredijilik bilen meşgullanýan ýaşlarynyň arasynda yglan edilen «Berkarar döwletiň ylham joşguny» atly döredijilik bäsleşiginiň ýeňijilerini sylaglamak dabarasy geçirildi.
Her ýyl geçirilmegi däbe öwrülen bäsleşige döredijilik bilen meşgullanýan ýaşlaryň ençemesi bilen birlikde, Türkmenistanyň Daşary işler ministrliginiň Halkara gatnaşyklary institutynyň tehnigi Amangeldi Ýegenow hem gatnaşdy. Ol özüniň hödürlän goşgulary bilen bäsleşikde 1-nji orna mynasyp bolmagy başardy. Munuň özi ýaşlaryň döredijilik ukyplaryny kämilleşdirmek üçin döredilýän mümkinçilikleriň nobatdaky beýanydyr. Bellemek gerek, ýaş şahyr Amangeldi Ýegenow ençeme wagtdan bäri döredijilik bilen meşgullanyp, metbugatda özüniň goşgulary bilen yzygiderli çykyş edip durýar. Ol bu bäsleşigiň ýaşlary döredijilik gözleglerine we täze üstünliklere ruhlandyrýandygyny buýsançly belleýär.
Bäsleşigiň ýeňijilerine Hormat hatlary we gymmat bahaly sowgatlar dabaraly ýagdaýda gowşuryldy.
Şamaral GARAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 1-nji ýyl talyby.