27/03/2024
1095
ÝAPONIÝANYŇ HALKARA MAKSATNAMALARY BOÝUNÇA BRIFING GEÇIRILDI
2024-nji ýylyň 27-nji martynda Türkmenistanyň Daşary işler ministrliginiň Halkara gatnaşyklary institutynda Ýaponiýanyň Türkmenistandaky Ilçihanasy tarapyndan Ýaponiýanyň bilim, medeniýet, sport, ylym we tehnologiýalar ministrligi tarapyndan guralýan halkara maksatnamalary boýunça brifing geçirildi. Maslahatyň dowamynda orta we ýokary okuw mekdeplerinde ýapon dilini öwrenýän okuwçylar we talyplar üçin niýetlenen Ýaponiýanyň bilim, medeniýet, sport, ylym we tehnologiýalar ministrligi tarapyndan guralýan “Öwreniji”, “Talyp”, “Ýörite hünär okuw mekdebiniň talyby”, “Ýapon dilini we medeniýetini öwrenýän talyp” ýaly halkara maksatnamalary hakynda giňişleýin gürrüň berildi. Maslahatyň ahyrynda ýokarda agzalan halkara maksatnamalary boýunça Ýaponiýada bilim alýan türkmen talyplarynyň birnäçesi agzalyp geçildi.
Geçirilen brifingiň esasy maksady ýurdumyzyň çäginde ýapon dilini öwrenýän okuwçylary we talyplary Ýaponiýanyň daşary ýurtly talyplar üçin niýetlenen halkara maksatnamalary bilen tanyşdyrmakdan, olarda ýapon dilini öwrenmäge bolan höwesi artdyrmakdan ybaratdyr. Nobatdaky duşuşygyň barşynda ylym, bilim we tehnologiýa ugurlarynda türkmen-ýapon özara hereketleriniň oňyn depgine eýedigi bellenildi. Çykyş edenler ylym-bilim ulgamyndaky özara gatnaşyklaryň has-da işjeňleşdirilmeginiň zerurdygyny nygtadylar.
Mundan başga-da, ýokary okuw mekdepleriň ugry boýunça gatnaşyklaryň ählitaraplaýyn pugtalandyrylmagy boýunça pikir alyşdylar. Brifing duşuşygynyň ahyrynda talyplar Türkmenistan bilen Ýaponiýanyň arasyndaky dostlukly we özara bähbitli hyzmatdaşlygy has-da ösdürmäge gönükdirilen sowallary berdiler we bu ugurda özara pikir alyşdylar.
Gurbangeldi GURBANOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň II ýyl talyby.