Wideoaragatnaşyk arkaly nobatdaky okuw sapagy
2021-nji ýylyň 14-nji iýunynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Koreýa Respublikasyndaky Adatdan daşary we Doly ygtyýarly ilçisi Myrat Mämmedaliýew “Koreýa Respublikasynyň diplomatiýasynyň taryhy we aýratynlyklary, sanly diplomatiýa we häzirki döwürde alyp barýan daşary syýasaty” temasy boýunça wideoaragatnaşyk arkaly okuw sapagyny geçirdi. Bu okuw sapagy Türkmenistanyň Daşary işler ministrligi tarapyndan gurnalýan toplumlaýyn onlaýn sapaklarynyň nobatdakysy bolup, institutyň talyplarynyň diplomatiýa bilen bagly bilim derejesini has hem kämilleşdirmek maksady bilen geçirilýär.
Okuw sapagynyň dowamynda hormatly ilçi Koreýa Respublikasynyň diplomatiýasynyň taryhy we aýratynlyklary barada giňişleýin maglumat berdi. Şeýle-de ilçi sanly diplomatiýa düşünjesi barada we häzirki döwürde alyp barylýan daşary syýasat barada giňişleýin gürrüň berdi we talyplar bilen sorag-jogap görnüşinde sapagy gurnady. Wideoaragatnaşyk ulgamy arkaly geçen okuw sapagyň barşynda Türkmenistan bilen Koreýa döwletleriniň arasyndaky dostlukly gatnaşyklar barada ilçi durup geçdi.
Okuw sapagynyň ahyrynda talyplar hormatly ilçä iki dostlukly ýurduň arasyndaky özara bähbitli hyzmatdaşlygy ösdürmäge gönükdirilen sowallary berdiler we bu ugurda gerekli maglumatlary aldylar.
Aýna NAZARGULYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara
žurnalistikasy fakultetiniň IV ýyl talyby.