WAGYZ-NESIHAT DUŞUŞYGY
2025-nji ýylyň 22-nji we 24-nji noýabrynda Halkara parahatçylyk we ynanyşmak ýylynyň nyşanynyň hem-de hemişelik Bitaraplygymyzyň many-mazmunyny düşündirmek boýunça Aşgabat we Arkadag şäherleriniň orta mekdeplerinde geçirilmeli wagyz-nesihat duşuşyklaryň tassyklanan meýilnamasyna laýyklykda, Türkmenistanyň Daşary işler ministrliginiň Halkara gatnaşyklary institutynyň Jemgyýeti öwreniş ylymlary kafedrasynyň mugallymy Güljahan Amanberdiýewanyň we talyp ýaşlaryň gatnaşmagynda Aşgabat şäheriniň Köpetdag etrabynyň 47-nji, 48-nji, 49-njy, 51-nji orta mekdeplerinde okuwçylar bilen wagyz-nesihat duşuşygy geçirildi.
Duşuşykda çykyş edenler türkmen Bitaraplygynyň milli nusgasynyň aýratynlyklary, Gahryman Arkadagymyzyň, Arkadagly Gahryman Serdarymyzyň öňe sürýän halkara başlangyçlarynyň ähmiýeti hem-de Halkara parahatçylyk we ynanyşmak ýylynyň nyşanynyň many-mazmuny barada giňişleýin gürrüň berdiler. Soňra mekdep okuwçylary özlerini gyzyklandyrýan sowallary berip, türkmen Bitaraplygy we onuň ähmiýeti bilen bagly düşünjelerini has-da berkitdiler.
Halkara parahatçylyk we ynanyşmak ýyly hem-de hemişelik Bitaraplygymyzyň şanly 30 ýyllyk baýramy mynasybetli geçirilen wagyz-nesihat duşuşygy ýaş nesilleri watansöýüjilik ruhunda terbiýelemekde, olaryň syýasy düşünjelerini artdyrmakda möhüm ähmiýete eýe boldy.
Güljahan AMANBERDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Jemgyýeti öwreniş ylymlary kafedrasynyň mugallymy.