Wagyz-nesihat duşuşygy geçirildi
2025-nji ýylyň 25-nji noýabrynda Türkmenistanyň Daşary işler ministrliginiň Halkara gatnaşyklary institutynda institutyň talyp ýaşlarynyň gatnaşmagynda wagyz-nesihat duşuşygy geçirildi. Oňa Türkmenistanyň Baş prokuraturasynyň uly prokurory Allamyrat Amandurdyýew, Türkmenistanyň Bilim ministrliginiň baş hünärmeni Derýa Ilmyradow gatnaşyp, ýaşlaryň iş üpjünçiligini döwrüň talaplaryna laýyklykda kämilleşdirmek hakynda täze maksatnamalaryň kabul edilýändigini nygtap geçdiler. Şeýle-de olar jemgyýetiň işjeň topary hasaplanýan ýaşlary hünär taýdan taýýarlamak, ýaş hünärmenler üçin mynasyp ýaşaýyş-durmuş şertlerini döretmek babatynda uly tagallalaryň edilýändigini aýtdylar. Ýokary okuw mekdebini tamamlaýan uçurymlary iş ýerlerine ýollamaklyk hakynda Türkmenistanyň Prezidentiniň 2019-njy ýylyň 3-nji fewralynda çykaran 1113-nji Karary bilen tassyklanan “Orta hünär bilimi we ýokary hünär bilimi edaralarynyň uçurymlaryny işe ýollamagyň” Düzgünnamasyna laýyklykda amala aşyrylýandygyny hem-de institutda degişli okuw ýyly üçin uçurymlary iş ýerlerine ýollamak boýunça ýörite iş toparynyň döredilýändigini bellediler. Şeýle-de Türkmenistanyň Prezidentiniň kararyna laýyklykda, ýokary hünär bilimini tölegli esasda alan uçurymlara okuwyny tamamlan ýyly diplomynyň asyl nusgasynyň berilýändigi barada baý mazmunly çykyş etdiler.
Wagyz-nesihat çäresinde Watanymyzyň mundan beýläk-de sazlaşykly ösüşine, halkara derejedäki abraýynyň ýokarlanmagyna goşant goşmaga gyzyklanmasy ýokary bolan ýaşlaryň işjeň we jogapkärçilikli durmuş ýörelgesi olaryň özleri üçin döwlet tarapyndan edilýän aladalara mynasyp jogaby bolup durýandygy aýratyn bellenildi.
Durdymyrat ŞYHMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň IV ýyl talyby.