WAGYZ-NESIHAT ÇÄRESI GEÇIRILDI
2020-nji ýylyň 22-nji ýanwarynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Baş Prokuraturasynyň hem-de Aşgabat şäher Polisiýa müdirliginiň wekilleriniň gatnaşmaklarynda wagyz-nesihat duşuşygy geçirildi. Oňa institutyň professor – mugallymlary we Halkara žurnalistikasy fakultetiniň talyplary gatnaşdylar.
Wagyz-nesihat duşuşygynyň dowamynda çykyş edenler köpçülik ýerlerinde özüňi alyp barmagyň medeniýeti, “Döwlet gullukçysy” hakyndaky, “Korrupsiýa” hakyndaky Kanunlar, ýol hereketiniň düzgünleri, pyýada bilen sürüjiniň arasyndaky sazlaşykly hereket, häzirki wagtda döwrüň möhüm meselesi bolan ýiti respirator ýokanjyna garşy göreşmek boýunça geçirilýän işler hem-de keselden goranmak üçin berk berjaý edilmeli kadalar hakynda birin-birin durup geçdiler. Şeýle-de olar durmuşdan alnan käbir pursatlary beýan edýän wideorolikleriň üsti bilen, sürüjileriň ýa-da pyýadalaryň günäsi bilen döreýän pajygaly ýagdaýlar hem-de öwezini dolup bolmajak ýitgiler hem-de Milli Liderimiziň adam hakyndaky aladasynyň çäksizdigi barada gürrüň etmek bilen, ýurdumyzyň ýol hereketinde ornaşdyrylýan sanly tehnologiýalaryň hem-de ýerasty we ýerüsti geçelgeleriň beýleki ösen döwletleriňkiden artyk bolmasa pes däldigini wideorolikleriň üsti bilen görkezip we deňeşdirip, bu ugurda giňişleýin maglumat berdiler we düşündirdiler.
Wagyz-nesihat duşuşygynyň ahyrynda oňa gatnaşanlar ýurdumyzy gülledip ösdürmek ugrunda tagallalary edýän Gahryman Arkadagymyzyň janynyň sag, ömriniň uzak, il – ýurt bähbitli tutumly işleriniň mundan beýläkde üstünliklere beslenmegini arzuw etdiler.
Aýlar ATAJYKOWA,
Türkmenistanyň Daşary işler ministrliginiň
Halkara gatnaşyklary institutynyň
halkara žurnalistikasy fakultetiniň talyby.