Onlaýn maslahat duşuşygy
2024-nji ýylyň 8-nji oktýabrynda Türkmenistanyň Jemgyýetçilik guramalarynyň merkezi binasynda Türkmenistanyň Magtymguly adyndaky Ýaşlar guramasynyň Merkezi Geňeşi tarapyndan “Türkmenistanyň Halk Maslahatynyň taryhy çözgütleri — täze eýýamynyň belent maksatlary, kämil geljegi gurmagyň möhüm ýoly” atly maslahat geçirildi. Bu maslahata ýurdumyzyň ýokary okuw mekdeplerinde, şol sanda Türkmenistanyň Daşary işler ministrliginiň Halkara gatnaşyklary institutynda bilim alýan talyp ýaşlar we zähmet çekýän mugallymlar onlaýn arkaly gatnaşdylar. Maslahat Türkmenistanyň Halk Maslahatynyň taryhy çözgütleriniň syýasy we jemgyýetçilik ähmiýetini wagyz etmeklige bagyşlandy.
Mälim bolşy ýaly, 2024-nji ýylyň 24-nji sentýabrynda Türkmenistanyň Halk Maslahatynyň nobatdaky mejlisi geçirildi. Onda Garaşsyz döwletimizde gazanylan üstünlikleriň, ýetilen sepgitleriň, ýerine ýetirilen işleriň jemi jemlendi. Şeýle hem döwrüň talaplaryndan, täze ykdysady şertlerden ugur alyp, täze taryhy eýýamda öňde durýan möhüm wezipeler ara alnyp maslahatlaşyldy. Halk Maslahatynyň mejlisinde Hormatly Prezidentimiz Arkadagly Gahryman Serdarymyz Garaşsyz, baky Bitarap Diýarymyzy mundan beýläk-de toplumlaýyn ösdürmäge gönükdirilen taryhy ähmiýetli birnäçe çözgütleri kabul etdi.
Maslahatyň ahyrynda oňa gatnaşanlar watanymyzy ösüşiň belent sepgitlerine tarap alyp barýan, ýaşlary ýurdumyzyň güýç-kuwwatyna deňäp, olaryň kämil şahsyýetler bolup kemala gelmegi üçin ähli mümkinçilikleri döredip berýän türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň hem-de Hormatly Prezidentimiz Arkadagly Gahryman Serdarymyzyň adyna alkyş sözlerini beýan etdiler.
Aýnur DOWLETÝAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň
II ýyl talyby.