Üstünlikleriňiziň höwri köp bolsun!
2023-nji ýylyň 31-nji maýynda Halkara ynsanperwer ylymlary we ösüş uniwersitetinde Gündogaryň beýik akyldary we nusgawy şahyry Magtymguly Pyragynyň doglan gününiň şanly 300 ýyllygy mynasybetli döredijilik duşuşygy geçirildi. Döredijilik duşuşygyna Türkmenistanyň Goranmak ministrliginiň «Milli goşun» žurnalynyň bölüm redaktory Aşyrmät Garly, Türkmen Döwlet çeperçilik akademiýasynyň Amaly haşam sungaty kafedrasynyň uly mugallymy, Aşgabat şäher Halk Maslahatynyň agzasy, zehinli zergär Aýjemal Çaryýewa, Türkmen Döwlet Medeniýet institutynyň bagtyýar talyby, tanymal şahyr Kerim Hallyýew, «Türkmengaz» döwlet konserniniň «Işçi iýmit üpjünçiligi we hyzmatlar» müdürliginiň Medeni işewürlik merkeziniň aýdymçysy Çynar Annamyradowa, Magtymguly adyndaky Türkmen Döwlet uniwersitetiniň 4-nji ýyl bagtyýar talyby, «Edebiýat we sungat» gazetiniň uly habarçysy Kerimberdi Hakberdiýew hem-de ýokary okuw mekdeplerinden talyplar gatnaşdylar. Duşuşygyň dowamynda türkmen edebiýatynyň düýbüni tutujy akyldar Magtymguly Pyragy, onuň döredijiligi dogrusynda durulyp geçildi. Şeýle-de ýaş aýdymçylaryň Magtymguly Pyragynyň şygyrlaryna döredilen aýdymlary ýerine ýetirdiler. Duşuşygyň ahyrynda, 2023-nji ýylyň 5-20-nji maý aralygynda dowam eden Magtymguly Pyragynyň doglan gününiň 300 ýyllygy mynasybetli «Dana Pyragy we gözel türkmen tebigaty» atly fotožurnalistika bäsleşiginiň netijeleri yglan edildi. Bu bäsleşikde biziň talyp deň-duşumyzyň hem baýrakly orundan paýly bolandygy bellärliklidir. Has takygy, Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 1-nji ýyl talyby Berdigylyç Ýazmyradow I dereje boýunça, ýagny žurnalistika hünärinde bilim alýan talyplaryň arasynda 3-nji orna mynasyp boldy. Biz hem talyp deň-duşumyza geljekde-de täze döredijilik üstünlikleriniň höwrüniň köp bolmagyny arzuw edýäris.
Yslam GURBANMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.