06/12/2023
1153
Üstünlikler dowamat dowam tapýar
2023-nji ýylyň 5-nji dekabrynda «Türkmenistanda daşary ýurt dillerini okatmagy kämilleşdirmegiň Konsepsiýasyndan» gelip çykýan wezipelerden ugur alyp, Halkara Bitaraplyk güni mynasybetli ýaşlaryň arasynda zehinleri ýüze çykarmak, döwletimiziň alyp barýan hoşniýetli daşary syýasaty babatynda bilimlerini artdyrmak maksady bilen, Döwletmämmet Azady adyndaky Türkmen milli dünýä dilleri institutynda ýokary okuw mekdepleriniň talyplarynyň arasynda geçirilen «Berkarar döwletiň bagtyýar ýaşlary» atly düzme ýazmak bäsleşiginiň jemleri boýunça sylaglanma dabarasy geçirildi.
Sanly ulgam arkaly 2023-nji ýylyň oktýabr aýynyň 18-ine sagat 14:00-da institutyň resmi internet saýtynda datmddi.edu.tm düzmäniň temasy yglan edildi. Gatnaşyjylar berlen tema boýunça BMG-niň resmi dilleri bolan iňlis, ispan, fransuz, rus, arap ýa-da hytaý dilinde düzme ýazdylar. Düzme ýazmak we ony guramaçylyk toparynyň garamagyna ugratmak üçin gatnaşyjylara 180 minut (3 sagat) wagt berildi. Bäsleşigiň ýeňijileri düzmäniň mazmunyna, logiki yzygiderligine we talybyň öz pikirlerini daşary ýurt dilinde beýan etmek ukybyna berlen bahalara görä kesgitlenildi we Baş baýrak, I, II, III derejeli diplomlar bilen sylaglanyldy. Sylaglanma dabarasynda ýeňiji bolan talyplar prezentasiýalar we wideo şekiller bilen çykyş etdiler. Netijede, Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 2-nji ýyl talyby Berdigylyç Ýazmyradow arzyly Baş baýraga, Halkara ykdysady gatnaşyklary fakultetiniň 1-nji ýyl talyplary Mähri Guzyçyýewa I orna, Myrat Maksadow bolsa III orna mynasyp boldy. Ýeri gelende belläp geçsek, bu bäsleşigiň geçen ýylky sanynda hem türkmen diplomatiýasynyň milli mekdebiniň talyplary dürli orunlar bilen bir hatarda Baş baýraga hem mynasyp bolupdylar. Şeýle üstünlikleriň dowamynyň dowamat bolýandygy institutymyzda daşary ýurt dillerini okatmagyň kämilleşdirilýändiginiň nobatdaky subutnamasydyr.
Mahym ANNADURDYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.