Üstünlige beslenen hepdelik
2025-nji ýylyň 27-nji iýunynda Ahal welaýatynyň Ak bugdaý etrabynyň «Nowruz ýaýlasyndaky» «Türkmeniň ak öýi» binasynda 22-nji iýunda badalga alan Medeniýet hepdeliginiň ýapylyş dabarasy geçirilip, Medeniýet we sungat işgärleriniň hem-de Magtymguly Pyragynyň şygryýet güni bellenildi.
Hemmämize mälim bolşy ýaly, Halkara parahatçylyk we ynanyşmak ýylyndaky bu hepdelik gadymyýetde beýik döwletleri dünýäniň taryhyna peşgeş beren Ahal topragynda geçirildi. Welaýatyň dürli ýerlerinde aýdym-sazly çykyşlar, konsertler, döredijilik duşuşyklary, sahna oýunlary we žurnalistleriň gatnaşmagynda dürli hili çäreler giňden ýaýbaňlandyryldy. Ine, şol çärelerde işjeňlik görkezen medeniýet we sungat ussatlary hem hepdeligiň ýapylyş dabarasyna jemlenip Watanymyzy, eziz Diýarymyzy wasp edýän aýdymlara seslerini goşdular.
Sungat toýunyň jemleýji dabarasyna türkmen diplomatiýasynyň milli mekdebi bolan Türkmenistanyň Daşary işler ministrliginiň Halkara gatnaşyklary institutynyň talyplary hem gatnaşdylar. Galyberse-de, ýurdumyzyň beýleki ýokary okuw mekdeplerinden hem mugallymlardyr talyplaryň bu dabara gatnaşandygyny bellemek gerek. Türkmen halkynyň milliligini alamatlandyrýan bu ajaýyp binanyň sahnasynda ýerine ýetirilen çykyşlar myhmanlarda Halkara parahatçylyk we ynanyşmak ýylynda geçirilen Medeniýet hepdeligi bilen bagly ýakymly ýatlamalary galdyrdy.
Dabaranyň ahyrynda oňa gatnaşyjylar hormatly Prezidentimiziň adyna Ýüzlenme kabul edip, bu çäräni ýokary derejede guramaga döredilen mümkinçilik üçin Gahryman Arkadagymyza hem-de Arkadagly Gahryman Serdarymyza alkyş sözlerini aýtdylar.
Baýnazar BAÝHANOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 1-nji ýyl talyby.