Uçurym dabarasy
2021-nji ýylyň 16-njy iýunynda Türkmenistanyň Daşary işler ministrliginiň Halkara gatnaşyklary institutynyň uçurymlarynyň baýramçylyk dabarasy geçdi. Oňa Türkmenistanyň Daşary işler ministrliginiň wekilleri hem-de professor-mugallymlar bilen birlikde, uçurym talyplaryň ene-atalary hem gatnaşdylar. Bu baýramçylyk dabarasyny açmak üçin Halkara gatnaşyklary institutynyň rektory Jumamyrat Gurbangeldiýewe, soňra Türkmenistanyň Daşary işler ministriniň orunbasary Berdi Mätiýewe, Türkmenistanyň Daşary işler ministrliginiň Ýewropa ýurtlary bölüminiň geňeşçisi Nury Amanmyradowa we Halkara gatnaşyklary institutynyň Halkara gatnaşyklary we diplomatiýa kafedrasynyň müdiri, professor, halypa diplomatymyz Amangeldi Rahmanowa uly hormat bilen söz berildi.
Dabaranyň dowamynda Halkara gatnaşyklary fakultetiniň uçurym talyby Bägül Kerimowanyň ejesi Annabibi Täjowa öz çykyşynda, ähli uçurym talyplarynyň ene-atalarynyň adyndan institutyň mugallymlarynyň talyplara beren bilimlerine, köp sag bolsun aýtdy. Soňra institutyň jemgyýetçilik-syýasy işlerine göreldeli gatnaşan we tapawutly bahalar bilen tamamlan talyplara institutyň hormat hatlary we Kärdeşler arkalaşygynyň ýadygärlik sowgatlary gowşuryldy.
Baýramçylyk dabarasynyň barşynda türkmen diplomatiýasynyň milli mekdebiniň ösmegine hemaýat edýän halkaraçy ýaşlary taýýarlamakda ähli mümkinçilikleri döredip berýän hormatly Prezidentimize köp sag bolsun aýdyldy.
Kyýat ILAMANOW,
Türkmenistanyň Daşary işler ministrliginiň
Halkara gatnaşyklalary institutynyň
Halkara žurnalistikasy fakultetiniň I ýyl talyby.