TÜRKMENISTANYŇ YNSANPERWERLIK UGRUNDA HALKARA HYZMATDAŞLYGYNA BAGYŞLANAN MASLAHAT GEÇIRILDI
2026-njy ýylyň 22-nji aprelinde Türkmenistanyň Daşary işler ministrliginiň Halkara gatnaşyklary institutynda «Türkmenistanyň ynsanperwerlik syýasatynyň durmuşa geçirilmegindäki işleriň halkara hyzmatdaşlygyndaky orny» atly ylmy-amaly maslahat geçirildi. Oňa Türkmenistanyň Magtymguly adyndaky Ýaşlar guramasynyň Aşgabat şäheriniň Berkararlyk etrap Geňeşiniň başlygy, Türkmenistanyň Daşary işler ministrliginiň wekili we ýokary okuw mekdebimiziň mugallymlarydyr talyplary gatnaşdylar.
Maslahatda Türkmenistanyň Magtymguly adyndaky Ýaşlar guramasynyň Aşgabat şäheriniň Berkararlyk etrap Geňeşiniň başlygy I.Ýakubow öz çykyşynda ýurdumyzyň BMG bilen ýaşlar syýasaty babatyndaky hyzmatdaşlygyň esasy ugurlary, şeýle hem Türkmenistanyň ýaşlarynyň halkara hyzmatdaşlygynyň 2023–2030-njy ýyllar üçin strategiýasy barada giňişleýin gürrüň berdi. Türkmenistanyň Daşary işler ministrliginiň wekili A.Jumagulyýew ýurdumyzyň halkara hyzmatdaşlygynyň ynsanperwer ugurlary barada belläp, Türkmenistanyň syýasy-diplomatik, söwda-ykdysady, ekologik howpsuzlyk hem-de medeni-ynsanperwer hyzmatdaşlyk bilen baglanyşykly başlangyçlary işjeň öňe sürýändigini nygtady.
Ylmy-amaly maslahatyň işi üstünlikli jemlenip, oňa gatnaşanlar türkmen halkynyň abadan durmuşda ýaşamagy, ýurdumyzyň halkara abraýynyň mundan beýläk-de pugtalandyrylmagy ugrunda ägirt uly tagallalary edýän Gahryman Arkadagymyza, Arkadagly Gahryman Serdarymyza hoşallyk sözlerini beýan etdiler.
Şyhdurdy ŞYHYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 3-nji ýyl talyby.